VOV4.Bahnar - Kơ sơ̆ ‘năr 25/9, Phŏ Thủ tướng Lê Văn Thành hlôi pơ gơ̆r ‘măng hop akŏm trực tuyến tơ lĕch jang tơ jră hăm ‘mi kial hơ bŭt Nô-ru. Kiơ̆ kơ ƀok Trần Hồng Thái, Kơ dră Anih vei lăng găh tŏ ‘mi kial, ‘mi kial hơ bŭt Nô-ru tŏk bŏk tak mơ̆t lơ̆m Biển Đông păng gô jing ‘mi kial hơ bŭt kơ sô̆ 4 sơ năm ‘nâu. ‘Nâu jĭ ‘mi kial hơ bŭt jăng hloh lơ̆m 20 sơ năm kơ âu ƀơm ưh kơ ‘lơ̆ng truh tơ ring tŏk bŏk. Pơ ma tơ̆ jơ hop akŏm, Phŏ Thủ tướng Lê Văn Thành athei rim anih tơm, anih jang, rim tơ ring kăl kơ chăng pơ gơ̆r jang kiơ̆ yông kon pơ lei oei tơ̆ anih sơ đơ̆ng, krao hơ vơn duk thŏng nan vih tơ̆ anih sơ đơ̆ng, ưh kơ gơh pơm pơ hơi. Anih tơm vei lăng Khŭl linh, Anih tơm vei lăng trong nơ năm, gre kơ dâu jang hơ dai hăm rim tơ ring dăr hơ len, vei lăng ăn duk thŏng nan oei lơ̆m đak dơ sĭ vih tơ̆ anih veh ver hai, vei sơ đơ̆ng ăn kon pơ lei hai, veh ver lê̆ đei ƀôh tơ drong duk thŏng nan vih tơ̆ anih veh ver đei hiong răm.

Phŏ Thủ tướng Lê Văn Thành athei tơ jră hăm ‘mi kial hơ bŭt Nô-ru

Oei tơ̆ găh Tu tơ ring Tây Nguyên, dêh char Kon Tum đei tơ dra gô ƀơm ưh ‘lơ̆ng đơ̆ng ‘mi kial Nô-ru. Vă tơ jră hăm ‘mi kial hơ bŭt, Dơ nŏ anih vei lăng kon pơ lei dêh char Kon Tum đei nơ̆r athei khul kơ dră pơ gơ̆r dôm tơ ring, anih jang kơ pal păng anih vei lăng dơ nâu đak, hnam kơ măy unh điên akŏm jơ hngâm tơ jră. Kiơ̆ kơ ‘nŏh, Kơ dră vei lăng kon pơ lei dêh char Kon Tum Lê Ngọc Tuấn athei Dơ nŏ anih vei lăng kon pơ lei dôm apŭng, plt păng dôm anih jang kơ pal tơ lĕch trong tơ jră hăm ‘mi kial kiơ̆ trong jang “4 kơ tă” mă lăp hăm ‘mi kial hơ bŭt, lăp hăm rim tơ drong tơ̆ tơ ring, tơ tom roi tơ băt ăn kon pơ lei vă gơ̆h kơ chăng vĕh ver. Dôm apŭng, plt pơ truh khul jang dăr lăng tơ̆ dôm tơ ring kon pơ lei oei xa tơ ter đak krong, thong đak, dơ nâu, tơ ring thŭng krê kơ đak lơ̆p, đak tơ jroh, tĕh hơ lih vă kơ chăng pơ gơ̆r chông kon pơ lei, pôk rĭ bơ̆n hnam mưh đei tơ drong krê.

Thuem hăm Dơ̆ng: Tơ blơ̆