VOV4.Bahnar - ‘Măng pơ long THPT sơ năm 2022 jĭ ‘măng pơ long gĭt kăl đei Khŭl kơ dră teh đak tôch kơ bơ ngơ̆t truh. Lơ̆m pơ gê ‘năr 7/7, Phŏ Thủ tướng Vũ Đức Đam hlôi năm hơ len lăng pơ long THPT tơ̆ hơ nih pơ long hnam trưng hŏk jăl 2 Nghĩa Tân, Cầu Giấy, Hà Nội, pơ lung hŏk tro păng mĕ ƀă hŏk tro. Lăp đơ̆ng rŏng kơ đe hŏk tro lĕch đơ̆ng lăm pơ long môn Ngữ Văn, Phŏ Thủ tướng Vũ Đức Đam hlôi năm apĭnh jet gia păng pơ lung đe hŏk tro găh tơ drong lăm pơ long păng ƀai hơ nat đơ̆ng đê pơ long... Phŏ Thủ tướng kŭm năm apĭnh jet gia đe mĕ ƀă hŏk tro găh đon tơ chĕng, jơ hngơ̆m đon hơ met ăn ‘măng pơ long gĭt kăl âu. Lăng ‘lơ̆ng tơ drong jang pơ gơ̆r ‘măng pơ long THPT sơ năm 2022 kơ pơ lei tơm Hà Nội păng dôm tơ ring lơ̆m tơ ring teh đak, Phŏ Thủ tướng Vũ Đức Đam tơ tă, tơ drong jang kiơ̆ tơ drong tơ chơ̆t pơ long athei mă tơ păt; hơ dai hăm pơm tơ drong hiôk tôch ai ăn hŏk tro. Mă loi ‘noh, hăm dôm bơ ngai năm klui dăh mă pơm glăi tơ drong pơ kăp lơ̆m lăm pơ long ‘noh kăl kơ lăng mă hơ len, ƀlep hăm yan âu, veh ver kơ lê̆ đe mon đei mơ mat yua kơ dôm tơ drong glăi ưh kơ kăl đei dăh mă ưh kơ pơ rơ̆ng ră.

Thuem: Tơ blơ̆