VOV4.Bahnar - “Rim anih tơm, anih jang Trung ương kăl kơ đei trong jang mă kơ tang vă pơ trŭt tơ lĕch jên tơ mơ̆t jên jang teh đak, khŏm hơ met pơ ‘lơ̆ng tơ drong 1,2 tơ drong jang tam mă đei hơ met ăn hơ len hla ar hô sơ ƀơ̆t ăn tơ drong jang tơ mơ̆t jên jang teh đak”. ‘Nâu jĭ athei đơ̆ng Phŏ Thủ tướng Vũ Đức Đam, Kơ dră Grŭp bơ̆ jang kơ sô̆ 3 tơ̆ ‘măng hop akŏm găh hơ len lăng, hơ met pơ ‘lơ̆ng mơ mat tat, tŭn pran tơ lĕch jên tơ mơ̆t jên jang teh đak sơ  năm 2022 ƀơ̆t bơ̆ jang hăm rim Anih tơm, anih jang Trung ương pơ gơ̆r ‘năr 17/5 tơ̆ Hà Nội. Kiơ̆ tơ roi tơ băt đơ̆ng Anih tơm tơ lĕch nơ̆r sơ kơ̆t păng tơ mơ̆t jên jang, akŏp trong tơ lĕch jang tơ mơ̆t jên jang teh đak sơ năm 2022 đei pơ jao ăn kơ rim anih tơm, anih jang trung ương găh Grŭp bơ̆ jang kơ sô̆ 3 ‘noh 12.019 ti hlak jên. Jô̆ truh đĭ khei 5, rim Anih tơm, anih jang Trung ương jô̆ pơ hlom tơ lĕch jên dang 464 ti hlak jên, đei 3,86% trong tơ lĕch jang sơ năm 2022, tơ̆ sĕt ƀiơ̆ kơ sô̆ jô̆ păh lăp atŭm lơ̆m teh đak ‘noh  20,27%, lơ̆m noh 13 anih jang tơ chĕng hơ drol tơ lĕch jên jang tôch kơ tŏ sĕt hơ la kơ 10%. Kơ dră chĕp kơ̆l rim Anih tơm, anih jang Trung ương akhan: vă pơ trŭt tơ lĕch jên ăn tơ mơ̆t jên jang teh đak, kăl kơ hơ nơ̆ng dăr hơ len, jang pơ keh dôm trong jang tơ gŭm khôi luơ̆t găh tơ mơ̆t jên jang, teh, pơ jing păng khôi luơ̆t đei ƀơm truh kiơ̆ trong klăih song ăn, pơm hla ar ƀônh găh tơ mơ̆t jên jang, tơ lĕch jên vă tơ gom hơ met pơ ‘lơ̆ng mơ mat tat, tơ hlăk tơ hlĭn, pơ trŭt tơ lĕch jên ăn tơ mơ̆t jên jang teh đak.

Thuem: Tơ blơ̆