VOV4.Bahnar - Pơgê năr 26/9, Anih vei lăng kon pơlei dêh char Bình Dương atŭm hăm Anih Axong jang apŭng plenh teh (Horasis), Anih jang Kŏng ngĭp Ấn Độ, pơtơm Hop akŏm jang hơdpo mŭk drăm Ấn Độ Horasis 2022 hăm hơnăn “Hơbĕch Việt Nam – xơkơ̆t trong jang 'nao”.

Vang năm akŏm đei Phŏ Thủ tươ̆ng Vũ Đức Đam păng Khul Kơpal kơ dôm anih jang tơm, anih jang Trung ương. Kiơ̆ tơdrong Hop akŏm hăm 6 tơdrong hop akŏm tôm păng 26 'măng pơma đam, Bình Dương 'meh vă gô chă đei dôm trong jang kăp gĭt, tơgop hơtŏk mŭk drăm Bình Dương. Pơma ăh lêh pơtơm hop akŏm, Phŏ Thủ tươ̆ng  Vũ Đức Đam xơkơ̆t tơring jang mŭk drăm đei jên axong jang đơ̆ng teh đak jing minh anih jang kăp gĭt lơ̆m tơdrong jang mŭk drăm, đei jơnei đơ̆ng dôm anih axong jang teh đak đe adoi nhen tơdrong đei jơnei kơ Việt Nam.  Hop akŏm đei pơgơ̆r jing 'măng vă Khul Kơpal teh đak, anih jang mŭk drăm kơ 2 teh đak Việt Nam - Ấn Độ tơroi găh pơkăp pơm jang hadoi vă atŭm băl hơtŏk tơ iung.   

VOV.VN

Tơblơ̆ nơ̆r: Lan