Thôn Hiệp Đồng, xah Hòa Xuân jĭ tơring bah đak krong Bàn Thạch. Lơ̆m 'măng 'mi kial đak hơbông ah sơnăm sơ̆, dôm jĭt tŏ hnam tơglơh tơpăi, jơ̆p pơlei ƀơm đak lơ̆p jrŭ, lơ unh hnam pă đei oei kiơ hloi. Dôm sơnăm hơdrol ki, rim 'măng 'mi tih, đak hơbông hơnơ̆ng lŏk jroh truh tơring kon pơlei oei xa. Kơyuơ noh, ah tơring đei tơchơ̆t pơm hnam veh ver kơ đak hơbông mă ưh đei teh vă pơm, unh hnam ƀok Nguyễn Văn Liễm kơdih plang asong hloh 400 met vuông teh, oei tơjê̆ hơnglah pêng trong vih vơ̆t kơ thôn, vă pơtơm ming man hnam oei atŭm veh ver kơ đak hơbông:  “Inh đei teh ah hơnglah pêng kiơ̆ trong vih vơ̆t, pơhlom 1.760 mét vuông. Inh plang asong, pơm hnam đĭ dôm yơ kŭm bưh, oei pă dôm yơ kŭm bưh, ưh đei pơm tơnap tap hăm Teh đak ôh. Kơdih inh ƀrơ̆k kơ jơhngơ̆m, inh asong teh mă inh kŭm hơ-iă mơ̆n. Ning mônh kơnh, ưh hơdrô̆ kơdih unh hnam inh, mă tôm kon pơlei pơla, chăl kon sou ning mônh kơnh gô đei hơnih oei veh ver kơ 'mi kial đak hơbông".

Tơ̆ thôn 1, xah Xuân Lãnh, unh hnam ƀok Nguyễn Văn Lang, prăt sơnăm hăt hot jang xa pơvih ăn tơdrong hơrih mă lei adoi plang asong 300 mét vuông teh vă pơm hnam oei tơpôl veh ver kơ đak hơbông. Teh plang asong jĭ minh mŭk tơmam kăp gĭt kơ minh unh hnam oei ƀơm tơnap tap. Mă lei đơ̆ng rŏng kơ pơyan 'mi kial đak hơbông sơnăm 2025, ƀôh đang măt kon pơlei kơdou kơ đak, ƀok tơchơ̆t asong teh kơ unh hnam ăn tơdrong pơm jang atŭm:  "Sơnăm 2025 đak hơbông tih, noh hli dêh, truh sơnăm 2026 'nhŏng oh lơ̆m hnam bu bu kŭm ƀrơ̆k kơ jơhngơ̆m, noh hơdrin plang asong teh vă pơm hnam oei tơpôl veh ver kơ đak hơbông ăn kon pơlei pơla"  

Đơ̆ng teh kơ unh hnam ƀok Lang, minh pôm hnam oei tơpôl kơjăp 'lơ̆ng hlôi đei ming man. Hnam đei 2 tăl, bơbŭng kơjung, pơm hơnih oei veh ver kơ đak hơbông, pơm hloi hơnih hŏk hôp atŭm ăn kon pơlei. Ƀok Lê Văn Đông, Kơdră thôn 1, xah Xuân Lãnh ăn tơbăt, 97 unh hnam kon pơlei hơrih rok tơjê̆ hăm đak glung tơ̆ thôn 1 dang ei đei bơih minh hơnih oei vă veh ver kơ 'mi kial đak hơbông tŏk blai:  "Ƀok Nguyễn Văn Lang hơrih tơ̆ tơring đei jơhngơ̆m đon 'lơ̆ng, 'mêm bơnat kơ kon pơlei, noh hlôi plang asong teh vă kon pơlei đei teh pơm Rông tơpôl. Kon pơlei kŭm chơt hơ-iă kơlih đei hơnih oei veh ver kơ 'mi kial đak hơbông tơhlu truh tơ̆ tơring ưh kơ ê"

Truh dang ei, pơhlom 100 tŏ hnam oei tơpôl veh ver kơ đak hơbông hlôi đei ming man tơ̆ dôm tơring hơnơ̆ng kơ ƀơm đak hơbông pơrăm tơ̆ dêh char Đăk Lăk, lơ̆m noh đei jê̆ 2.000 met vuông teh kơyuơ 5 unh hnam kon pơlei plang asong. Hăm dôm unh hnam oei tơnap tap, noh ưh hơdrô̆ tơdrong tơgop gah mŭk drăm, mă oei jing jơhngŏm đon kăp gĭt, sơnong 'lơ̆ng hăm tơpôl. Kơlih ah 'mi kial đak hơbông truh, tơdrong kăp gĭt hloh noh ah đon bơnôh 'lơ̆ng kơchăng atŭm vang glơng, atŭm dih băl găn hloh tơdrong sar bar hrat hrin.