Mă đơ̆ng hơgăt teh să 3ha tơ̆ tơring Gào pơlei tơm Pleiku, ƀok Lê Sỹ Đại (pơlei oei tơ̆ Hà Tĩnh) tŏk bŏk găh pơprŏ teh mơdro sa, mă lei tơngla teh hlôi ming man glăi đei 4 tŏ hnam tơ̆r, 4 pơsŭn đei pơbŭng păng mơjĭt pơbŭng hnam ming man kơ jăp ‘lơ̆ng, atŭm hăm trong man lơ̆m hơgăt teh au ... Khei ‘năr ming man đơ̆ng sơnăm 2020 păng trŭh dang ei, Dơnŏ anĭh vei lăng kon pơlei tơring Gào hlôi pơm 2 hla bơar tơchơ̆t phak kơ yuơ pơm glăi atŭm hăm nơ̆r tơchơ̆t athei tơvih hơgăt tĕh nhen so. Mă lei, lăp đơ̆ng rŏng sơng iŏk hla bơar tơchơ̆t phak, ƀok Đại sa roi ming man lơ hlŏh dơ̆ng. ‘Nao au, ƀok Dương Xuân Hồng, Kơ iĕng Kơdră chĕp pơgơ̆r Dơnŏ anih vei lăng kon pơlei tơring Gào tơbăt hlôi chĭh pơtrŭh hla bơar ăn Dơnŏ anih vei lăng kon pơlei kơ pơlei tơm Pleiku, apĭnh asong iung jang yuih hŭt pơđĭ hnam ming man au. “Lơ̆m hơmet ming, Dơnŏ anĭh vei lăng kon pơlei tơring jei hlôi năm pơm hla bơar, xek phak; chĭh hla bơar apĭnh athei Dơnŏ anĭh vei lăng kon pơlei kơ pơlei tơm pơjing tơdrong tơchơt xek phak. Mĭnh ƀar ‘măng Dơnŏ anĭh vei lăng kon pơlei tơring hlôi krao hơvơn, mă lei tơngla teh khan sư hruih tơ̆ nai, kơna ư̆h kơ gơ̆h vă tơƀơ̆p, nhôn jur trŭh tơ̆ hơnih jei ư̆h kơ tơƀơ̆p, năm truh dăr lăng ư̆h kơ đei bơngai jang, ư̆h tơƀơ̆p bơngai lơ̆m ŭnh hnam sư”.

Jei lei lăi, tơ̆ Koeng 5, phương Thắng Lợi, Pơlei tơm Pleiku, ƀok Vũ Trung Anh hăm rim ŭnh hnam tơjê̆ jei ming man glăi lơ̆m hơgăt teh chŏh jang sa. Trŭh dang ei, hơnih ming man glăi đei hơgăt teh să trŭh 300m2, ‘nŏh đei hnam oei, dur pơgar. ‘nao au, kiơ̆ đơ̆ng kon pơlei tơbăt, Dơnŏ anĭh vei lăng kon pơlei kơ pơlei tơm Pleiku ƀô̆h tơ̆ bro teh chŏh jang sa tơter trong glung Tô Vĩnh Diện (Phương Hoa Lư). ɃokNguyễn Văn Tùng, Kơdră chĕp pơgơ̆r Dơnŏ anĭh vei lăng kon pơlei phương Thắng Lợi tơbăt, đei lơ tơdrong pơm ăn trŭh tơdrong tim tom ƀô̆h, đei ƀô̆h mă lei tơlang tơnap keh đang rim hơnih ming man glăi. Lơm au, đei tơdrong tơm pơm ăn ‘nŏh găh trong bơ̆ jang đơ̆ng kang ƀô̆ păng tơdrong mă ƀar ‘nŏh tơdrong pơrơ̆ng pơm glăi đơ̆ng kon pơlei:“Jơ ‘năr ‘nŏh ư̆h kơ hlŏh 24 jơ jô̆ đơ̆ng pơm hla bơar kăl pơtrŭh ăn. Mă lei mư̆h pơtrŭh ăn akhan chĭh ư̆h hơdăh, kơdră kơpal pơtrŭh hơlơ̆k dơ̆ng kơna mă klui. Mĭnh ‘nu bơngai pơm glăi bơ̆n măh pơm hla bơar lơ ‘măng, pơm tôch mơmat tat ăn kơ phương, lơ̆m mă tơdrong jang jei lơ, kang ƀô̆ bơ̆ jang tơnap, khôi luơ̆t tơplĭh hơnơ̆ng. Jơhngơ̆m đon kon pơlei oei gơnang yua, đei bơngai oei tơjră plơ̆, đe sư oei vei hơnơ̆ng trong so, đe hăp tơƀô̆h ăn hơnĭh au, hơnĭh to”.

Kiơ̆ hla bơar tơbăt đơ̆ng Dơnŏ anĭh vei lăng kon pơlei kơ pơlei tơm Pleiku, đơ̆ng năr 1/1/2020 trŭh năr 31/8/2022, lơ̆m pơlei tơm hlôi đei 84 ‘măng pơm glăi găh groi teh-tơ iung pơjing glăi hlôi tơchơ̆t phak, păng athei hơmet pơ ‘lơ̆ng hơgăt teh nhen so. Mă lei trŭh dang ei, lăp đei 42 ‘măng pơm glăi hlôi xek tơlang keh đang. Ƀok Mai Văn Hoàn, Kơdră chĕp pơgơ̆r Hơnĭh bơ̆ jang vei lăng Mŭk drăm bri brăh păng cham char pơlei tơm Pleiku tơbăt:“Tơ̆ au, lăng găh tơdrong bơ̆ jang vei lăng kơ khŭl kơdră tơring. Dôm tơdrong ‘nŏh, rim tơring phương đe sư băt ngăl, mă lei đei hơnih ư̆h kơ gan lăng trŭh. ‘Măng blŭng, đe ngêh ngăi chă ming man pơgia đĕch, mă lei mư̆h ƀô̆h ‘nŏh đĭ hlŏh tơdrong bơih. Trŭh jơ ‘năr mă ‘nŏh pă đei lơ̆m hơnăp gơ̆h jang, pơtrŭh ăn pơlei tơm, Dơnŏ anĭh vei lăng pơlei tơm pơjao ăn Kơdră chĕp pơgơ̆r Dơnŏ anĭh vei lăng kon pơlei tơring, phương, đe jei ư̆h kơ gan lăng kơ jăp trŭh tơdrong au.”.

Tơ̆ ‘măng hop akom mă Tơsĭn, Jơnŭm vei lăng kon pơlei dêh char Gia Lai jăl XII (jăl jang 2021-2026) au ki, apĭnh hơlen găh tơdrong pơm glăi tơ iung pơjing ming man glăi lơ̆m hơgăt tĕh chŏh jang sa, mĭnh ƀar ‘nu kơdră tang măt akhan: lơ hơnĭh ming man tĭh, đei ming man lơ̆m khei ‘năr đunh, mă lei bơ̆ jang tơchă ƀô̆h ư̆h tơtom. Dĭng trŭh ming man keh đang, xek tơlang yuih hŭt pơđĭ gô pơm hiong răm lơ ăn tơpôl. Tơl nơ̆r găh tơdrong au, ƀok Lương Thanh Bình-Kơ iĕng Kơdră chĕp pơgơ̆r Dơnŏ anĭh vei lăng Mŭk drăm Bri brăh păng Cham char dêh char Gia Lai tơbăt:“Găh tơdrong vei lăng năng tông groi teh tơ̆ rim tơring, hơnăp jang tơm ‘nŏh Dơnŏ anĭh vei lăng kon pơlei rim phương. Găh hơnăp jang kơ Hơnĭh bơ̆ jang, vă hơmet pơ ‘lơng dôm tơdrong tim gan trŏ lăp, tim mă ‘lơ̆ng kơpal, Dơnŏ anĭh vei lăng Mŭk drăm Bri brăh păng Cham char dêh char hlôi pơchŏh trong ăn Dơno anĭh vei lăng kon pơlei dêh char. Kiơ̆ kơ ‘nŏh, Dơnŏ anĭh vei lăng kon pơlei dêh char pơrô̆ athei rim hơnĭh bơ̆ jang ƀơm trŭh păng rim tơring, atŏk kơtang bơ̆ jang pơrô̆ pơrôp, pơtho tơbăt păng xek tơlang kơhret dôm tơdrong pơm glăi”.

Vă atŏk kơtang bơ̆ jang vei lăng păng hơmet pơ ‘lơ̆ng pơm glăi găh groi teh, tŏk bŏk sơnăm 2022, Dơnŏ anĭh vei lăng kon pơlei kơ pơlei tơm Pleiku hlôi pơjing Khŭl bơ̆ jang năm dăr lăng găh tơdrong ming man, groi teh tơ̆ rim tơring, phương đei lơ hơnĭh ming man glăi, pơm ăn tơpôl kon pơlei ư̆h kơ lăp đon. Tơchĕng hơlau, trŭh blŭng sơnăm 2023, pơlei tơm gô tơbăt hơdăh găh pơtôch xek tơlang rim hơnĭh ming man glăi păng xek tơlang hơnăp jang Kơdră chĕp pơgơ̆r rim tơring bơ̆ jang ư̆h kơ ‘lơ̆ng, pơm ăn đei tơdrong đunh khei ‘năr lơ lau.