VOV4.Bahnar - Hơ iă kơ ‘măng tơ băt 47 sơ năm năr tơ blăh iŏk rơ ngei dêh char Kon Tum (16/3/1975- 16/3/2022), 69 sơ năm năr Bơ ngai phĭ rup Việt Nam, kơ sơ̆ 15/3, ƀât rup man Tơ blăh jơ nei lơ̆m cham xă kơ thĭ trơ̆n Măng Đen, apŭng Kon Plông, Khul chih pơ chĕh – čhơ̆, phĭn rup dêh char Kon Tum jang hơ doi hăm Dơ nŏ anih vei lăng kon pơ lei apŭng Kon Plông pơ gơ̆r Pơ dă um rup.

Kon pơ lei păng bơ ngai chă tơ mang lăng truh lăng ngôi rup lơ̆m ‘măng pơ dă

‘Măng pơ dă um rup âu, ming tơ ƀôh 120 tŏ rup đơ̆ng 12 ‘nu bơ ngai phĭn. ‘Nâu jĭ dôm um rup adrol ki đei ming pơ dă tơ̆ Trung ương păng tơ ring bơih. Lơ̆m nŏh đei lơ rup iŏk đei tơ mam hơ păh lơ̆m dôm tơ drong thi phĭn rup lơ̆m tĕh đak păng tơ̆ tĕh đak đe. ‘Măng pơ dă pơ gơ̆r đơ̆ng ‘năr 15 - 25/3 – trŏ lơ̆m jơ năr pơ gơ̆r thi hơ ri hơ xoang kơ dôm hơ drĕch kon kông tơ ring Trường Sơn - Tây Nguyên ‘măng mă III sơ năm 2022 păng pơih dơ̆ng ‘măng dôm anih chă tơ mang lăng tơ̆ dêh char kơ na gô pơ jing đei lơ tơ drong ‘lơ̆ng.

Dơ̆ng: Tơ blơ̆