VOV4.Bahnar - Pơ gê ‘năr (14/4), tơ̆ hnam Kuôk hô̆i, pơ gơ̆r blŭng a ‘Măng hop akŏm mă 10 kơ Anih chĕp kơ̆l pơ gơ̆r Kuôk hô̆i jăl 15. Tơ̆ ‘măng hop akŏm âu, Anih chĕp kơ̆l pơ gơ̆r Kuôk hô̆i ăn tơ gop nơ̆r lơ̆m lơ tơ drong tơm gĭt kăl vă hơ met ăn pơ truh tơ̆ ‘Măng hop akŏm mă 3 kơ Kuôk hô̆i. Găh tơ drong jang pơ jing khôi luơ̆t, Anih chĕp kơ̆l pơ gơ̆r Kuôk hô̆i gô ăn tơ gop nơ̆r găh dôm tơ drong jang: Luơ̆t đak dâu ( hơ met ming), Luơ̆t tang găn teh dong băl lơ̆m ŭnh hnam ( hơ met ming), Luơ̆t hơ met ming, tơ mơ̆t dơ̆ng 1,2 hơ păng đơ̆ng Luơ̆t Tần số vô tuyến điện, Luơ̆t dăr hơ len ( hơ met ming), Luơ̆t Khăm jĭ, hơ met jĭ ( hơ met ming); ăn tơ gop nơ̆r găh tơ chĕng hơ drol Tơ drong jang pơ jing luơ̆t, khôi luơ̆t tơm sơ năm 2023... Găh dôm tơ drong mŭk drăm - tơ pôl, Anih chĕp kơ̆l pơ gơ̆r Kuôk hô̆i ăn tơ gop nơ̆r: Roi tơ băt đơ̆ng Khŭl kơ dră teh đak pơ tôch tơ drong jang kiơ̆ tơ drong Tơ chơ̆t kơ sô̆ 42 sơ năm 2017 đơ̆ng Kuôk hô̆i găh pơ long lăng hơ met ‘lơ̆ng hre kơ nê̆ đơ̆ng dôm anih jang asong tŏk iŏk; hla ar chih ming tơ drong tơ chơ̆t đơ̆ng Kuôk hô̆i găh trong jang tơ gŭm hơ drô̆, hơ tŏk tơ iung dêh char Khánh Hòa; trong jang klăih song jên ăn dôm tơ drong jang găh Tơ drong jang tơ iung ming păng hơ tŏk tơ iung mŭk drăm - tơ pôl, lơ̆m noh, set hơ len găh hơ năn tơ drong jang tơ mơ̆t jên jang găh Tơ drong jang tơ iung ming mŭk drăm păng trong jang hơ met hơ tŏ jên Tơ drong jang tơ iung ming mŭk drăm - tơ pôl păng jên tơ mơ̆t jên jang teh đak păh lăp khei ‘năr jăl jang 2021-2025.

Thuem: Tơ blơ̆