VOV4.Bahnar - Hop akŏm Kơ dră tơm vei lăng pơ tho pơ hrăm ASEAN ‘măng mă 12 đei pơ gơ̆r tơ̆ Hà Nội. ‘Nâu jĭ tơ drong jang đei lơ̆m dôm Hop akŏm ƀok Kơ dră, kuan tih anih pơ tho pơ hrăm ASEAN yoa Anih tơm vei lăng pơ tho pơ hrăm Việt Nam pơ gơ̆r lơ̆m jăl jang pơm Kơ dră pơ lơh băl găh jang hơ doi lơ̆m tơ drong pơ tho pơ hrăm ASEAN sơ năm 2022 păng 2023.

Hop akŏm Kơ dră tơm vei lăng pơ tho pơ hrăm ASEAN ‘măng mă 12 đei pơ gơ̆r tơ̆ Hà Nội

Tơ̆ Hop akŏm Kơ dră tơm vei lăng pơ tho pơ hrăm ASEAN mă 12, đe ƀok Kơ dră dôm tĕh đak ASEAN vă pơ ma găh tơ drong pơ tho pơ hrăm tơ̆ rim tĕh đak, roi tơ băt ăn băl dôm tơ drong kăl tơ̆ yăn âu păng chă trong jang hơ doi năm truh tơ drong atŏk tơ iung pơ tho pơ hrăm pran kơ jăp tơ̆ rim teh đak, mă loi đơ̆ng rŏng kơ jĭ COVID-19 hrei ‘nâu. Hop akŏm oei vă tơ lĕch lơ tơ drong jang lơ̆m Trong jang găh pơ tho pơ hrăm ASEAN đơ̆ng 2021-2025 păng pơ ma nuh găh dôm tơ drong nai hai.

Đơ̆ng rŏng kơ hop akŏm Kơ dră tơm vei lăng pơ tho pơ hrăm ASEAN ‘măng mă 12, Kơ dră tơm vei lăng pơ tho pơ hrăm Việt Nam Nguyễn Kim Sơn pơ gơ̆r Hop akŏm Kơ dră tơm vei lăng pơ tho pơ hrăm ASEAN+3 (hăm dôm tĕh đak Hàn Quốc, Nhật Bản, Trung Quốc) ‘măng mă 6 păng Hop akŏm tih Kơ dră tơm vei lăng pơ tho pơ hrăm Đông Á ASEAN-EAS (đei dôm tĕh đak ASEAN+3 păng dôm tĕh đak jang hơ doi ‘nŏh Mi, Úc, New Zealand, Nga, Ấn Độ) ‘măng mă 6.

VOV/Dơ̆ng tơ blơ̆