VOV4.Bahnar - Pơ gê hei (23/5), tơ̆ Hnam Kuô̆k hô̆i, Anih tơm Hà Nội vă pơ gơ̆r hop akŏm mă 3, Kuô̆k hô̆i jăl 15. Kiơ̆ tơ drong tơ chĕng, hop akŏm pơ gơ̆r lơ̆m 19 năr, (vă pơ tôch lơ̆m ‘năr 16/6/2022). ‘Nâu jĭ hop akŏm atŭm mă blŭng đơ̆ng rŏng 2 sơ năm ƀơm ưh ‘lơ̆ng đơ̆ng jĭ Covid 19. 

Hop akŏm mă 3, Kuô̆k hô̆i jăl 15 pơ gơ̆r ƀât mă jơ̆p lơ̆m tĕh đak oei tơ lĕch jang tôch pơ neh, đei yoa tơ drong jang tơm tang găn jĭ COVID-19 păng Tơ drong jang tơ iung ming dơ̆ng, atŏk tơ iung mŭk drăm, tơ pôl; mă loi, Hop akŏm mă 5 Khul kơ dră chĕp kơ̆l Trung ương Đảng jăl 13 ‘nao pơ tôch ‘lơ̆ng hơ iă, hơ nhăk đei lơ jơ hngâm pran vă adrin jang khŏm đei tơ drong Tơ chơ̆t đơ̆ng Hop akŏm mă 13 kơ Đảng lơ̆m chăl ‘nao.

Tơ̆ hop akŏm, Kuô̆k hô̆i hơ len năng, drơ̆ng nơ̆r ăn 5 kơ luơ̆t, 3 tơ drong tơ chơ̆t păng tơ gop nơ̆r ăn 6 kơ luơ̆t nai hai. Kuô̆k hô̆i oei ‘măn lơ jơ vă hơ len năng dôm tơ drong jang mŭk drăm, tơ pôl, jên thu mong, tơ lĕch jang păng tơ chơ̆t dôm tơ drong gĭt kăl nai kơ tĕh đak.

Dơ̆ng: Tơ blơ̆