VOV4.Bahnar - Pơ gê 28/6, Khul kơ dră chĕp kơ̆l Đảng ƀô̆ plt Hà Nội pơ gơ̆r hop akŏm ‘măng mă 8, set hơ len, tơ gop nơ̆r ăn 1,2 tơ drong, lơ̆m nŏh đei tơ drong jang atŏk tơ iung hnam oei tơ̆ plt Hà Nội, đơ̆ng 2021-2030; Hla ar chih tơ roi găh tơ drong jang đơ̆ng Đảng ƀô̆ plt kiơ̆ tơ drong Tơ chơ̆t kơ sô̆ 15 đơ̆ng Anih tơm Chinh trĭ găh trong jang, tơ drong vă jang atŏk tơ iung anih tơm Hà Nội truh sơ năm 2030, trong jang truh sơ năm 2045.

Pơ ma ƀât blŭng hop akŏm, Găh tơ drong jang atŏk tơ iung hnam oei tơ̆ plt Hà Nội đơ̆ng 2021-2030, Bí thư đảng plt Đinh Tiến Dũng ăn tơ băt, tơ drong jang hlôi đei Khul kơ dră chĕp kơ̆l đảng kơ Dơ nŏ anih vei lăng kon pơ lei plt chih hơ met tôch hơ len, ‘moi kiơ̆ tơ drong hơ găt, trong vă jang.

Hla ar chih tơ roi đơ̆ng Khul kơ dră chĕp kơ̆l đảng kơ Dơ nŏ anih vei lăng kon pơ lei plt ăn ƀôh 6 khei blŭng sơ năm, plt hlôi tang găn ‘lơ̆ng tơ drong jĭ Covid-19; dôm tơ drong jang xa, tĕch mơ dro, chă tơ mang lăng, anih et xa, hnam hotel đei pơih ‘măng dơ̆ng hlôi pơih đei trong jang tơ iung mung mŭk drăm. Thu mong jên ăn tĕh đak tơ̆ plt tŏk hlŏh 20% pơ têng hăm khei âu sơ năm 2021 păng iŏk đei vă jê̆ 57% kơ sô̆ hơ găt lơ̆m sơ năm. Mŭk drăm lơ̆m plt 6 khei blŭng tŏk 7,79% - hlŏh 1,29 ‘măng kơ sô̆ tŏk lơ̆m khei âu sơ năm 2021.

Dơ̆ng: Tơ blơ̆