VOV4.Bahnar - Pơ gê ‘năr 21/6, Thủ tướng teh đak Phạm Minh Chính hlôi pơ gơ̆r Hop akŏm tơ băt hơ dăh trong proh hơ met vă jang păng pơ trŭt tơ mơ̆t jên jang tơ ring tơ măn đak krong Cửu Long khei ‘năr 2021-2030 lơ̆m ‘năr 21 khei 6 sơ năm 2022 tơ̆ pơ lei tơm Cần Thơ hăm tơ drong vang akŏm đơ̆ng dôm anih tơm, anih jang trung ương, dôm tơ ring tơ măn đak krong Cửu Long, pơ lei tơm Hồ Chí Minh, dôm bơ ngai tơ mơ̆t jên jang, bơ ngai jang mơ dro sa, bơ ngai jang hơ dai hơ tŏk tơ iung, dôm bơ ngai joăt jang păng bơ ngai jang khoa hŏk.

Jơ hop akŏm

Hop akŏm hlôi tơ băt hơ dăh tơ drong jang đơ̆ng Khŭl kơ dră teh đak găh trong vă jang hơ tŏk tơ iung mŭk drăm tơ pôl păng vei sơ đơ̆ng teh đak, sơ đơ̆ng tơ ring tơ măn đak krong Cửu Long jang kiơ̆ tơ drong tơ chơ̆t kơ sô̆ 13 đơ̆ng Anih tơm Chĭnh trĭ; tơ băt hơ dăh trong pơ proh hơ met vă jang tơ ring tơ măn đak krong Cửu Long kiơ̆ hơ găt đơ̆ng Luơ̆t proh hơ met; pơ trŭt tơ mơ̆t jên jang ăn tơ ring tơ măn đak krong Cửu Long. Tơ̆ hop akŏm dôm bơ ngai tang măt akŏm pơ ma dơ nuh lơ̆m dôm tơ drong găh proh hơ met tơ ring tơ măn đak Cửu Long khei ‘năr 2021-2030, lăng truh sơ năm 2050. Thủ tướng teh đak Phạm Minh Chính pơ ma hơ dăh, kăl kơ hơ tŏk pran kơ tang dôm tơ drong kăl lơ̆m teh đak, mă loi ‘noh kon bơ ngai, athei hơ tŏk tơ iung hrĕnh păng kơ jăp, lăp hăm ahih dơ̆ng, hơ năp jang kơ tơ ring; lăng ‘nâu jĭ hơ năp jang ‘lơ̆ng tơ păt, gĭt kăl, đei tơ drong ‘lơ̆ng hơ iă hăm tơ drong hơ tŏk tơ iung kơ dôm tơ ring păng pơ đĭ hloi lơ̆m teh đak.

Thuem: Tơ blơ̆