VOV4.Bahnar - Pơ gê ‘năr (26/05), Hop akŏm tơ̆ hơ năp kơnh châu Á ‘măng mă 27 hlôi pơ gơ̆r tơ̆ Anih tơm Tokyo, Nhật Bản hăm tơ drong vang năm kơ tă đơ̆ng lơ kơ dră chĕp kơ̆l Châu Á nhen Thủ tướng Singapore Lý Hiển Long, Thủ tướng Thái Lan Prayut Chan-o-chan. Phŏ thủ tướng Phạm Bình Minh chĕp kơ̆l khŭl tang măt Việt Nam vang năm kơ tă tơ̆ hop akŏm. Hop akŏm ‘măng âu đei hơ năn “ Hơ met ming hơ năp jang đơ̆ng châu Á lơ̆m apŭng plĕnh teh tơ klăih băl” Hơ dai hăm dôm ƀai iung pơ ma trực tuyến đơ̆ng dôm kơ dră chĕp kơ̆l, lơ ‘măng pơ ma dơ nuh lơ̆m 2 năr hăm hơ năn nhen: Tơ plih apŭng plĕnh teh đơ̆ng châu Á- tơ̆ hơ năp kơnh đei pơm tơ iung yua đơ̆ng dôm anih jang mơ dro sa; Ưh kơ lăp băl đơ̆ng Mi - Trung păng ƀơm ưh kơ ‘lơ̆ng truh sơ đơ̆ng, mŭk drăm kơ châu Á; Hơ tŏk tơ iung anih jang mơ dro sa châu Á ‘moi kiơ̆ tơ ƀơ̆p pơ gơ̆r joh ayŏ... gô đei pơ gơ̆r. Kiơ̆ đơ̆ng noh, dôm teh đak châu Á gô jang hơ dai kơ jăp hloh dơ̆ng lơ̆m tơ drong tơ jră hăm dôm long nol ‘nao lơ̆m tơ ring păng jơ̆p plei teh, pơ jing 1 tơ ring hơ tŏk tơ iung tơ gop ăn tơ drong rơ ngei păng sơ đơ̆ng kơ tơ ring.

Thuem: Tơ blơ̆