Pơ gê 3/11, tơ̆ anih tơm Vientiane (Lào), Anih tơm vei lăng khul linh, Anih tơm vei lăng jang kơ măy, tĕch mơ dro Việt Nam jang hơ doi hăm Anih tơm vei lăng khul linh, Anih tơm vei lăng jang kơ măy, tĕch mơ dro Lào pơ gơ̆r Jơ nŭm kơ chơ pơ dă tơ mam Việt Nam – Lào hăm hơ năn “Hơ iă kơ sơ năm tơ guăt 1 ƀơ̆r đon, jang tơ bôl ‘lơ̆ng hơ iă Việt Nam – Lào 2022”.

Vang truh akŏm đei dang 120 kơ deng tơ mam đơ̆ng vă jê̆ 90 anih jang xa, anih tĕch mơ dro truh đơ̆ng Việt Nam, lơ̆m noh đei dang 30 anih jang xa kơ khul linh. Kŭm hăm ‘nŏh, vă jê̆ 30 kơ deng tơ mam đơ̆ng anih tĕch mơ dro Lào păng 1,2 anih tĕch mơ dro đơ̆ng tĕh đak đe.

Jơ nŭm kơ chơ pơ dă tơ mam jĭ 1 lơ̆m dôm tơ drong jang chinh trĭ, tơ pôl tih Hơ iă kơ sơ năm tơ guăt 1 ƀơ̆r đon, jang tơ bôl ‘lơ̆ng hơ iă Việt Nam – Lào 2022, kŭm jing jơ năr vă dôm anih tĕch mơ dro Việt Nam pơ ma atŭm păng dôm anih jang xa kơ khul linh Việt Nam pơ ma hơ drô̆ đei tơ drong ‘lơ̆ng chă tơ ƀâp, pơ ma nuh, tơ chă trong jang hơ doi, pơih xă tơ drong pơ vei tĕch mơ dro hăm dôm anih tĕch mơ dro kơ Lào, anih tĕch mơ dro kơ khul linh Lào păng anih tê̆ch mơ dro kơ dôm tĕh đak ASEAN...