VOV4.Bahnar - Pơ gê 8/9, plt HCM pơ gơ̆r Kơ chơ chă tơ mang lăng apŭng plenh tĕh plt HCM 2022 (ITE HCMC 2022). Phó Thủ tướng Vũ Đức Đam vang truh pơm lêh, kŭm hăm hlŏh 1.500 ‘nu bơ ngai tang măt ‘nŏh jĭ dôm bơ ngai dơ̆ng tang ăn dôm anih vei lăng, bơ ngai juăt jang găh tơ mang lăng, dôm anih chă tơ mang lăng đơ̆ng 45 dêh char lơ̆m tĕh đak păng 28 tĕh đak.

Lêt kăt che pơih blŭng ăn Kơ chơ chă tơ mang lăng apŭng plenh tĕh plt HCM 2022

Hăm hơ năn “Vang yak hơ doi, vang yak tŏk kơ jăp”, Kơ chơ ‘măng mă âu đei hơ mĕng pơih đei hlŏh 6.000 tơ drong pơ kă tĕch mơ dro đơ̆ng bơ ngai răt păng dôm anih pơ dă. Lơ̆m tơ drong pơ gơ̆r Kơ chơ đei pơ gơ̆r hloi lơ tơ drong hôp tih nhen: Hop akŏm tih găh chă tơ mang lăng “Trong jang tưk tơ iung ming păng hơ tŏk tơ drong chă tơ mang lăng lơ̆m apŭng plenh tĕh kơ jăp ‘lơ̆ng”, hop akŏm “Tưk hơ tŏk anih chă tơ mang lăng tơm păng tơ drong pran ‘lơ̆ng đơ̆ng Việt Nam”, “Tơ plih kơ măy sô̆ lơ̆m tơ drong chă tơ mang lăng” păng lơ trong roi tơ băt anih truh ‘lơ̆ng. 

Lơ̆m 3 năr pơ gơ̆r Kơ chơ đơ̆ng ‘năr 8/9 truh 10/9, kon pơ lei păng bơ ngai chă tơ mang lăng gơ̆h chă hơ len năng lơ tour, tơ mam chă tơ mang lăng lơ̆m tĕh đak păng tơ̆ tĕh đak đe ‘nao pơ jing, hăm lơ tơ drong tơ gŭm tôch hơ iă.

Dơ̆ng: Tơ blơ̆