VOV4.Bahnar - Pơ gê ‘năr (6/10), tơ̆ pơ lei tơm Buôn Ma Thuột, dêh char Dak Lak hlôi pơ gơ̆r ‘Măng pơ long Hơ drĕng cheh phe Việt Nam 2022 (Vietnam Amazing Roast Master 2022) yua đơ̆ng Khŭl jang Cheh phe Buôn Ma Thuột pơ gơ̆r. ‘Măng pơ long đei pơ gơ̆r tih kơ teh đak, akŏm 35 ‘nu bơ ngai vang pơ long đơ̆ng 13 dêh char pơ lei tơm lơ̆m teh đak. Dôm bơ ngai pơ long gô athei yak hloh dôm tơ drong pơ long, ‘noh đei: lăng tơ drong ‘lơ̆ng cheh phe găr; pơm hơ drĕng; pơm ăn kơ đe huch. Tơ drong ‘nao đơ̆ng ‘măng pơ long âu pơ têng hăm dôm ‘măng pơ long hơ drĕng apŭng plĕnh teh ‘noh jĭ yua cheh phe Robusta Việt Nam; bơ ngai pơ long athei pơm hăm phin păng athei gơh kloh klĕch 3 tơ drong: lăng tơ drong ‘lơ̆ng cheh phe găr, hơ drĕng păng pơm ăn đe huch.

Bơ ngai pơ long iŏk hla ar rơih jơ păng kơ măy hơ drĕng

‘Măng pơ long pơ gơ̆r đơ̆ng ‘năr 6 -9/10/2022,  hăm tơ drong dăr lăng đơ̆ng Khŭl ki thuơ̆t ‘noh đei 13 ‘nu bơ ngai joăt jang hlôh vao lơ̆m dôm ‘măng pơ long cheh phe. Khŭl châm pơ long ‘noh đei 6 ‘nu châm hơ drĕng, pơm ăn đe huch Espresso (lơ̆m noh đei 3 ‘nu đơ̆ng apŭng plĕnh teh);  6 ‘nu châm hơ drĕng, pơm ăn đe huch hăm phin.

VOV Tây Nguyên/Thuem tơ blơ̆