VOV4.Bahnar - Gơ măng  ‘năr 4/8, tơ̆ Hnam joh hơ ri pơ lei tơm Hồ Chí Minh pơ gơ̆r lêh pơ long pơ re nơ̆r lơ̆m teh đak ‘măng mă XV- 2022 hăm hơ năn “Tơ plih hơ gei - jang tŏk kiơ̆’. Đơ̆ng hloh 500 ƀai vang pơ long, Khŭl pơ gơ̆r hlôi rơ̆ih đei 203 ƀai mơ̆t lơ̆m ‘măng pơ long hơ tuch tơ̆ dôm kơ loăi đơ̆ng chih tơ roi, apĭnh jet, pơm tông, ra por kơ tă. Pơ ma pơ gơ̆r, ƀok Nguyễn Trọng Nghĩa, Bí thư Trung ương Đảng, Kơ dră anih tơ roi tơ băt Trung ương akhan, pơ long pơ gơ̆r lơ̆m khei ‘năr đĭ đăng Đảng, đĭ đăng kon pơ lei păng đĭ đăng lĭnh bơ̆n tŏk bŏk tơ lĕch kơ sư̆k pơ jei băl, khŏm jang kiơ̆ jơ nei tơ drong tơ chơ̆t Hop akŏm bơ ngai tang măt lơ̆m teh đak ‘măng mă 13 kơ Đảng; 1 jơ hngơ̆m đon jang kiơ̆ dôm trong jang tơ gŭm đơ̆ng Đảng păng teh đak vă tơ iung ming păng hơ tŏk tơ iung mŭk drăm - tơ pôl đơ̆ng rŏng jĭ hơ buh COVID-19. 

Kơ dră anih tơ roi tơ băt Trung ương Nguyễn Trọng Nghĩa pơ ma pơ tho

Ƀok Nguyễn Trọng Nghĩa athei Radio nơ̆r pơ ma Việt Nam pơ ma hơ drô̆, anih pơ re nơ̆r Việt Nam pơ ma atŭm păng dôm bơ ngai jang chih hla ar tơ roi pơ re nơ̆r lơ̆m teh đak kăl pơm kiơ̆ nơ̆r pơ tho đơ̆ng Kơ dră Hồ Chí Minh. Pơ re nơ̆r Việt Nam kăl kơ jing kênh tơ roi tơ blang ăn tơ pôl hăm tơ drong tơm pơ jing trong jang tơ gŭm trŏ ƀlep, đei kơ sư̆k arih lơ̆m yan âu, tơ gop lơ̆m vei lăng sơ đơ̆ng chĭnh trĭ tơ pôl păng hơ tŏk tơ iung teh đak, pơ̆ih să kon pơ lei pơm tơm, hơ tŏk ‘lơ̆ng tơ drong chĕp kơ̆l đơ̆ng Đảng, vei lăng đơ̆ng teh đak hăm tơ pôl.

Thuem: Tơ blơ̆