VOV4.Bahnar - Gơ măng ‘nâu, 26/3 tơ̆ Hội An, dêh char Quảng Nam, Anih tơm vei lăng găh Joh ayŏ, Tơ plŏng kơ dâu păng Tơ mang lăng păng Anih vei lăng kon pơ lei dêh char Quảng Nam pơ gơ̆r lêh sơ năm tơ mang lăng teh đak -  Quảng Nam 2022 hăm hơ năn “ Hơ nih truh tơ mang lăng rơ goh ‘lơ̆ng”. Sơ năm tơ mang lăng teh đak jĭ tơ drong jang joh ayŏ - mŭk drăm - tơ pôl ‘lơ̆ng, đei pơ gơ̆r kơ teh đak, apŭng plĕnh teh păng đei pơ gơ̆r hơ nơ̆ng rim sơ năm. Tơ drong pơm lêh pơ gơ̆r Sơ năm tơ mang lăng teh đak - Quảng Nam 2022 đei pơm tơ̆ cham joh hơ ri Ƀlŏk dơ̆ng Hội An. Cham joh hơ ri hơ dai kơ măy kơ mŏk re, ŭnh điên hơ dăh ‘nao kŭm hăm hloh 600 ‘nu bơ ngai hơ ri hơ soang păng nghệ nhân tơ pôl vă pơm đei dôm hơ nih ‘lơ̆ng akŏm lơ kơ mâu joh ayŏ kơ dŏ soang... ‘Nâu jĭ tơ drong hiôk vă roi tơ ƀôh um rup, dôm kơ jă kăp gĭt joh ayŏ, tơ mam drăm tơ mang lăng ‘lơ̆ng hơ iă; hơ tŏk loi dơ̆ng pơ trŭt, jang hơ dai hơ tŏk tơ iung tơ mang lăng đơ̆ng rim tơ ring, hơ tŏk ‘lơ̆ng anih dơ̆ng, um rup teh đak, kon bơ ngai Việt Nam pơ ma atŭm păng dêh char Quảng Nam pơ ma hơ drô̆, pơ trŭt tơ drong tơ iung ming hơ tŏk tơ iung tơ drong jang tơ mang lăng yua đơ̆ng ƀơm ưh kơ ‘lơ̆ng kơ tang yua đơ̆ng jĭ hơ buh Covid-19.

Thuem: Tơ blơ̆