Gơ măng hei (4/11), tơ̆ Cham să Lâm Viên pơ lei tơm Đà Lạt, Trung ương Đoàn hơ druh tơ dăm Cộng sản Hồ Chí Minh jang hơ dai hăm Anih jang Đảng dêh char, Anih vei lăng kon pơ lei dêh char Lâm Đồng pơ gơ̆r lêh pơ jao tơ mam hơ păh Lương Định Của ‘măng mă 17 păng pơ jao tơ mam hơ păh pơ tôch Tơ drong pơ long tơ iung tơ drong jang sa hơ druh tơ dăm tơ ring tơ rang sơ năm 2022. Hloh 17 sơ năm pơ gơ̆r, Tơ mam hơ păh Lương Định Của hlôi pôk pơ ư 2.050 “bơ ngai jang chŭn mir hơ gei hloh”. Păng sơ năm ‘nâu, tơ mam hơ păh đei pơ jao ăn kơ 32 ‘nu hơ druh tơ dăm hơ gei hăm đon hơ drin yak hloh pơm pơ drŏng păng iŏk đei jơ nei ‘lơ̆ng lơ̆m teh đak.

Lơ̆m dôm hơ druh tơ dăm iŏk Tơ mam hơ păh Lương Định Của sơ năm 2022, lơ buăl mơ lôh đei iŏk yua hloh 30 ti hlak jên păng đei buăl iŏk đei  706 ti hlak jên, iŏk yua kơ ti hlak jên rim sơ năm. Mă loi ‘noh, lơ buăl hơ druh tơ dăm bơ ngai kon kông tơ̆ tơ ring oei mơ mat tat mă lei hăm đon hơ drin hlôi yak hloh pơm pơ drŏng trŏ ƀlep, jing dôm bơ ngai mơ lôh pơ drŏng hloh. ‘Nâu jĭ dôm bơ ngai jang tôch kơ ‘lơ̆ng dôm tơ drong jang hơ druh tơ dăm pơ jei băl pơm tơ lĕch, tĕch mơ dro hơ gei, sơ năm mơ lôh vang tơ gŭm pơ jing tơ ring tơ rang ‘nao tơ̆ tơ ring.