VOV4.Bahnar - ‘Năr 10/6, tơ̆ xăh Ea Kpam, apŭng Cư Mgar, dêh char Dak Lak, Grŭp jang Xuân Thiện pơm lêh pơ jing Tơ ring choh jang xa hăm kơ măy kơ mŏk ‘nao Xuân Thiện – Cư Mgar. ‘Nâu jĭ tơ drong jang blŭng a lơ̆m dôm tơ drong jang vă pơ jing trong jang hơ doi găh choh jang xa, rong kon tơ rong, pơm tơ mam hăm kơ măy kơ mŏk ‘nao đơ̆ng Grŭp jang, tơ mât jên jang xa tơ̆ Dak Lak, akŏm đĭ đăng jên jang hlŏh 1 ti USD (hơ tŏ hăm hlŏh 25.760 ti).

Lêh tơ lĕch tơ drong jang pơ jing Tơ ring choh jang xa hăm kơ măy

Tơ ring choh jang xa hăm kơ măy kơ mŏk ‘nao Xuân Thiện – Cư Mgar đei jên jang hlŏh 705 ti, tơ̆ hơ găt tĕh xă hlŏh 100 ha, hăm dôm tơ drong jang tơm: Pơ long năng păng chă rơih trong ơng tơ đăh ‘long pơ tăm ‘lơ̆ng, plei lơ, ưh đei pơ rang jĭ; pơ jing trong jang mưh choh jang xa hăm kơ măy kơ mŏk ‘nao păng roi tơ ƀôh kơ măy kơ mŏk; pơ jing anih pơm tơ mam, ‘măn răk păng tĕch mơ dro tơ mam đơ̆ng choh jang xa đei; pơ jing anih truh hơ len năng, hŏk pơ hrăm găh choh jang xa rơ gei păng chă tơ mang lăng tơ̆ mir pơ gar; jang hơ doi vang pơ tho ăn kăn ƀô̆ păng kon pơ lei jang chŭn mir găh trong choh jang xa hăm kơ măy kơ mŏk ‘nao. Kiơ̆ trong vă jang, lơ̆m jăl khei mă IV/2023 tơ drong jang ‘nâu gô pơ jing đang, truh jăl khei mă I/2024 ‘nŏh gơ̆h pơm tơ lĕch đei tơ mam tĕch tơ̆ ‘ngoăih.

Dơ̆ng: Tơ blơ̆