VOV4.Bahnar - ‘Năr (8/4), Dơ nŏ anih vei lăng kon pơ lei plt Buôn Ma Thuột, dêh char Dak Lak tơ lĕch hla ar chih găh hơ nơ̆ng pơm pơ hơi, hơ met ming 1,2 trong jang tang găn jĭ COVID-19 mă lăp hăm rim tơ drong dang ei.

Kiơ̆ kơ ‘nŏh, iŏk đơ̆ng 6h, ‘năr 12/4, plt Buôn Ma Thuột asong pơ gơ̆r bơ̆ jang dơ̆ng tơ ‘ngoăih, tơ̆ hnam hăm kơ sô̆ bơ ngai akŏm ưh gơ̆h hlŏh 100 ‘nu păng athei pơm kiơ̆ tơ dỏng hơ găt tang găn jĭ COVID-19; Asong tơ iung dơ̆ng 50% kơ sư̆k jang xa, tĕch mơ dro tơ̆ anih hơ xoang, hơ ri Karaoke, anih et xa, mát xa, internet, pơm ngôi điên tư; Dôm anih pơ vih pơ văn, et xa, dôm hnam hơ kŭm đei bơ̆ jang dơ̆ng mă lei athei pơm kiơ̆ mă ‘lơ̆ng tơ drong hơ găt; Pơ gơ̆r pơ tho hŏk kơ tă tơ̆ hnam trơng hăm hŏk tro lăm 9 păng hŏk tro Trung học phổ thông.

Jô̆ truh ‘năr 8/4, plt Buôn Ma Thuột đei vă jê̆ 50 rơ bâu ‘nu bơ ngai jĭ COVID-19, lơ̆m nŏh đei hlŏh 10 rơ bâu ‘nu bơ ngai oei hơ met. Lơ bơ ngai jĭ COVID -19 tơ̆ Buôn Ma Thuột ưh kơ đei jĭ ăl, ƀât lăp ưh đei hiĕn, yuh păng hơ met kơ dih tơ̆ hnam.

Dơ̆ng: Tơ blơ̆