VOV4.Bahnar - Lăp lơ̆m dang 1 giĕng tơ jê̆ âu, pơ lei tơm Buôn Ma Thuột, dêh char Dak Lak hlôi đei 2.482 ‘nu jĭ Covid -19, lơ̆m noh đei 2.245 ‘nu lơ̆m tơ pôl. Tơ̆ hơ năp đei ƀôh krê hơ mơt đơ̆ng jĭ hơ buh, kơ sơ̆ ‘năr 22-2, pơ lei tơm Buôn Ma Thuột hlôi tơ lĕch tơ roi tơ băt kơ sô̆ 524 găh tơ drong tơ mơ̆t yua 1,2 trong jang tang găn jĭ Covid -19 lơ̆m pơ lei tơm jô̆ đơ̆ng 6 jơ pơ gê ‘năr  23/2/2022 ding truh đei tơ roi tơ băt plơ̆ng. Kiơ̆ kơ ‘noh, pơ lei tơm Buôn Ma Thuột athei pơ dơh ‘mơ̆i tơ drong jang tĕch mơ dro đei hơ mơt kơ tơ ploh lơ ( hơ nih hơ soang, karaoke, mátxa, anih et sa, Internet, pơ ngôi điện tử), rim hơ nih ngă ‘noh kăt tơ sơng tơ ngyơh, spa... Pơ dơh ‘mơ̆i pơ tho hŏk kơ tă hăm jăl mầm non păng tơ lĕch jang tơ drong jang pơ tho hŏk trực tuyến hăm jăl 1, lăm 6, 7, 8 păng lăm 10, 11.

Đe hŏk tro jăl 1 păng lăm 6, 7,8,10,11 gô hŏk trực tuyến hơ lơ̆k dơ̆ng vă tang găn jĭ hơ buh

Hơ drô̆ lăm 9, lăm 12 păng dôm hơ nih pơ tho hŏk nai lơ̆m pơ lei tơm pơ gơ̆r pơ tho hŏk kơ tă mă lei đei vei sơ đơ̆ng lơ̆m tơ drong jang tang găn jĭ COVID-19; thây kô pơ tho, sinh viên, hŏk tro vang pơ tho păng hŏk athei đei ƀet tôm 2 jrŭm vắc xin dăh mă klăih kơ jĭ COVID-19 ưh kơ hloh 6 khei.

 Jô̆ truh khei ‘năr dang ei, pơ lei tơm Buôn Ma Thuột hlôi đei 7.540 ‘nu jĭ Covid -19, lơ̆m noh đei 2620 ‘nu hlôi hơ met klăih. Buôn Ma Thuột kŭm jing tơ ring mĭnh drô̆ đĕch kơ dêh char Dak Lak tŏk bŏk jing tơ ring krê hơ mơt lơ.

Thuem: Tơ blơ̆