VOV4.Bahnar - Đơ̆ng ‘năr 4 truh ‘năr 13/5, hŏk tro lăm 12 lơ̆m teh đak chih măt vang pơ long tốt nghiệp jăl 3 sơ  năm 2022  lơ̆m kơ măy vei lăng pơ long kơ Anih tơm vei lăng găh pơ tho pơ hrăm. Tơ drong ‘nao ‘noh tơ plih yua kơ chih măt lơ̆m hô sơ hla ar ‘noh sơ năm ‘nâu ‘măng mă blŭng, hŏk tro chih măt vang pơ long trực tuyến, hơ drô̆ hŏk tro pơ long kơ dih gô oei chih măt kơ tă lơ̆m hla ar tơ̆ anih jang yua đơ̆ng Anih tơm vei lăng găh pơ tho pơ hrăm hơ găt. Mă đơ̆ng jing sơ năm mă blŭng tơ lĕch jang chih măt vang pơ long trực tuyến, mă lei tơ drong chih măt đơ̆ng hŏk tro pơ gơ̆r hiôk, tơ jur đei ƀôh glăi păng pơm kơ đeh đei jơ năr pơ têng hăm chih măt hăm kơ phiê̆u nhen rim sơ năm.

Đe hŏk tro lăm 12 chih măt vang pơ long trực tuyến lơ̆m kơ măy vei lăng pơ long đơ̆ng ‘năr 4/5 truh ‘năr 13/5 tơ̆ hnam trưng phổ thông. Vă đe hŏk tro pơm joăt, Anih tơm vei lăng găh pơ tho pơ hrăm pơ̆ih kơ măy vă hŏk tro chih măt vang pơ long lăng. Tài khoản ‘noh kơ sô̆ kăn kươk kon pơ lei dăh mă hla ar chư̆ng mĭnh kon pơ lei đơ̆ng hŏk tro. Bơ ngai ưh kơ đei kăn kươk kon pơ lei dăh mă hla ar chư̆ng minh kon pơ lei ‘noh iŏk yua kơ sô̆ chih hơ năn đei anih jang kŏng an asong vă tơ plih ăn.

Lăp đơ̆ng rŏng kơ Anih tơm vei lăng găh pơ tho pơ hrăm pơ̆ih kơ măy vei lăng pơ long, oh Nguyễn Xuân Mạnh, hŏk tro lăm 12, Hnam trưng hŏk jăl 3 Phúc Lợi, Hà Nội hlôi pơ̆ih mơ̆t lơ̆m trang web vă chih măt vang pơ long tốt nghiệp jăl 3 sơ năm 2022. Đĭ đei 1 giĕng hơ drol ‘noh vă chih măt pơ long lăng, kơ na Mạnh lăp hiong 2,3 pơ nĭt vă chih đang kơ phiê̆u chih măt đơ̆ng sư hăm 16 tơ drong tơm, hrĕnh ƀiơ̆ lơ pơ têng hăm hô sơ hla ar:

“Ƀơ̆t chih măt pơ long lăng ‘noh oh kŭm đei chih măt pơ long lăng păng đei thây kô pơ tho păng năr chih măt tơ pă ‘noh oh ƀôh kŭm ưh kơ đei tơ ƀơ̆p mơ mat tat kiơ ôh”.

       ‘Ngoăih kơ pơm kơ đeh jơ hloh pơ têng hăm hô sơ hla ar, chih măt pơ long tốt nghiệp jăl 3 trực tuyến oei tơ gŭm hŏk tro vei lăng kŭm nhen hơ met ming đei kơ tơ̆ng ang đơ̆ng kơ dih hrĕnh, ƀlep lơ̆m kơ plăh chih măt. Mĭnh ‘nu hŏk tro nai tơ̆ Hà Nội tơ roi:

“Tơ drong online nhen hrei ‘nâu ‘noh tơ drong lăng hơ len kơ tơ̆ng ang kŭm ƀônh hloh ƀơ̆t mă đei tơ drong kơ tơ̆ng ang mă lu oh ưh kơ băt ‘noh sư tơ bôh lê̆ tơ̆ ‘noh hloi, lu oh lăp mơ̆t 1 trong ƀônh ƀŏ hloh.”

        Lơ̆m dôm năr mă blŭng chih măt vang pơ long tốt nghiệp jăl 3, kơ sô̆ hŏk tro chih măt tam mă lơ, mă lei rim hnam trưng oei hơ met ăn thây kô vei lăng tơ drong jang pơ tho chih tơ roi hô sơ ăn hŏk tro. Đe thây kô vei lăng lăm kŭm tơ roi ăn hŏk tro chih hô sơ păng dôm tơ drong tơ plih mă hŏk tro kăl kơ băt. Vă pơm hiôk ăn hŏk tro, rim hnam trưng adoi hơ met tôm lăm kơ măy tĭnh đei chô̆ internet sơ đơ̆ng păng ăn thây kô pơ tho kơ măy kơ mŏk kơ tơ̆ng ang gô tơ gŭm đe oh. Yă Huỳnh Thị Hòa Bình, Kơ dră chĕp kơ̆l Hnam trưng hŏk jăl 3 Lạng Giang kơ sô̆ 1, dêh char Bắc Giang tơ băt:

        “Hăm tơ drong hŏk tro chih măt kơ dih trực tuyến ‘noh dang ei đe oh kŭm yua kơ tă dôm điên thoăi đơ̆ng đe oh, dăh mă kơ măy vi tĭnh đơ̆ng đe oh tơ̆ hnam, tơ drong ‘nâu sư tôch kơ hiôk ăn kơ hŏk tro. Mă lei, lơ̆m kơ plăh tơ lĕch jang hăm hŏk tro ‘noh hnam trưng ƀôh đe oh đa đei dôm tơ drong, pơ tih gia nhen đe sư ‘nao mơ̆t lơ̆m tài khoản, tơ plih mật khẩu, mă lei lăp đơ̆ng rŏng kơ ‘noh đe sư hiơt hloi mật khẩu kơ dih sư. Hnam trưng hơ met ăn kang ƀô̆ tơ gŭm, đang kơ ‘noh khŭl thây kô vei lăng lăm 12 ling lang tơ gŭm đe oh.”

        Hơ dai hăm tơ drong hiôk, ‘noh kơ plăh chih măt vang pơ long tốt nghiệp jăl 3 trực tuyến kŭm đei ƀôh 1,2 tơ drong ưh kơ ‘lơ̆ng, nhen tơ ley tơ mơ̆t internet ưh kơ sơ đơ̆ng pơm ăn 1,2 ‘nu hŏk tro đei tăh tơ lĕch đơ̆ng trang web lơ̆m kơ plăh chih hô sơ. Hơ dai hăm ‘noh, tơ drong chih mã số phường, xăh thoi yơ, môn tơ gŭm hơ drol lơ liơ kŭm pơm ăn lơ hŏk tro ưh kơ băt, athei gơ nang kơ thây kô tơ gŭm. Kô pơ tho Bùi Thị Hồng Duyên, Hnam trưng Liên cấp Việt- Úc, Hà Nội tơ roi:

       “Gô đei tơ ƀơ̆p mơ mat tat găh trong tơ ley. Mă 2 ‘noh lơ̆m kơ plăh chih măt trực tuyến ‘noh 1,2 ‘nu oh tơ ƀơ̆p mơ mat tat ‘noh jĭ tơ drong chih măt phường, xăh đei lơ̆m kơ măy chih măt kơ dih mơ mat tat. Mă 3 ‘noh jĭ 1,2 ‘nu oh oei bơ ngơ̆t găh tơ drong đe oh đei athei pơ long  nơ̆r teh đak đe dăh ưh.”

            Ƀok Phạm Quốc Khánh, Phŏ Kơ dră Anih vei lăng tơ drong ‘lơ̆ng ( Anih tơm vei lăng găh pơ tho pơ hrăm) tơ băt, ‘nâu jĭ ‘măng mă blŭng tơ lĕch jang ăn kơ hŏk tro lăm 12 chih măt vang pơ long trực tuyến, kơ na Anih tơm hlôi bơ̆ jang kiơ̆ pơ long lăng chih măt trực tuyến tơ̆ 2 hnam hŏk jăl 3 tơ ring mơ mat tat kơ dêh char Bắc Giang păng Hòa Bình păng pơ tôch đe hŏk tro pơm kiơ̆ chih măt trực tuyến tôch kơ hiôk:

        “Tơ̆ 2 hnam trưng hŏk jăl 3 tơ̆ tơ ring mơ mat tat kơ pơ đĭ 2 tơ ring âu, pơ tôch blŭng a đe oh hŏk tro tă chơt hơ iă ngăl păng tôch kơ ƀônh pơm kiơ̆. Kơ tă lăng rim oh hŏk tro pơm ‘noh gơh ƀôh akhan đe oh tôch kơ chhôk hơ iă păng pơm tôch kơ hrĕnh, 3 pơ nĭt đĭ đang bơ̆ih, yua kơ phần mềm kŭm tôch hơ gei păng lơ̆m noh hlôi đei 1 lơ̆m dôm tơ drong vang tơ gop tôch kơ gĭt kăl đơ̆ng thây kô pơ tho lơ̆m tơ drong jang pơ gơ̆r ‘noh jĭ hơ len lăng păng jang pơ keh hơ nih mong răk hla ar anih jang pơ tho pơ hrăm păng 2 hnam trưng tơ̆ tơ ring mơ mat tat dêh hloh kơ 2 tơ ring ‘noh đĭ đăng đe oh tă kơ đei kơ sô̆ chih hơ năn.”

        Hăm đe hŏk tro pơ long kơ dih, đơ̆ng rŏng kơ nôp kơ phiê̆u chih măt vang pơ long tốt nghiệp jăl 3 kơ tă tơ̆ anih jang yua đơ̆ng Anih vei lăng găh pơ tho pơ hrăm hơ găt, hŏk tro gô đei anih jang chih măt vang pơ long asong tài khoản (‘noh jĭ kơ sô̆ kăn kươk kon pơ lei dăh mă hla ar chư̆ng minh kon pơ lei đơ̆ng hŏk tro) păng mật khẩu vă chih mơ̆t lơ̆m kơ măy vei lăng pơ long.

        Anih tơm vei lăng găh pơ tho pơ hrăm tơ tă, hŏk tro athei vei ôn tài khoản păng mật khẩu. Tơ dăh hiơt tài khoản păng mật khẩu, hŏk tro gơh tơ roi hăm hnam trưng - hơ nih chih măt vang pơ long vă đei asong dơ̆ng.

                                                                                                                        VOV

Thuem: Tơ blơ̆