VOV4.Bahnar - Năr ‘nâu (07/07), rim hŏk tro lơ̆m teh đak pơ tơm yak mơ̆t lơ̆m ‘măng pơ long tốt nghiệp THPT sơ năm ‘nâu hăm môn pơ long Ngữ văn kiơ̆ trong chih kơ dih, jơ pơm ƀai 120 pơ nĭt. Tơ̆ kơ sơ̆, pơ long toán.  Lơ̆m teh đak đei 63 Jơ nŭm vei lăng pơ long, hăm 2 rơ bâu 243 hơ nih pơ long. Đei 38 ‘nu hŏk tro F0 vang pơ long. Kiơ̆ tơ roi tơ băt hrĕnh đơ̆ng Anih tơm vei lăng pơ tho pơ hrăm, jô̆ truh 8 jơ 1 puăt kơ măng ‘năr 6/07, hlôi đei 989 rơ bâu ‘nu hŏk tro năm tơ̆ dôm hơ nih pơ long lơ̆m teh đak pơm hla ar vang pơ long, oei hloh 10 rơ bâu ‘nu hŏk tro tam mă pơm hla ar vang pơ long. Lơ̆m pơ gê ‘nâu, dôm hŏk tro hơ nơ̆ng pơm hla ar vang pơ long hơ drol kơ pơ long môn mă blŭng kơ ‘Măng pơ long ‘noh môn Ngữ văn. Anih tơm vei lăng găh pơ tho pơ hrăm tơ băt, pơ têng hăm ‘măng pơ long tốt nghiệp sơ năm sơ̆, ‘măng pơ long sơ năm ‘nâu Anih tơm đei 1,2 tơ drong hơ met ming găh ki thuơ̆t lơ̆m tơ drong pơ gơ̆r pơ long, vă tang găn tơ drong pơ gơ̆m lơ̆m pơ long. Yua thoi noh, rim hŏk tro kăl kơ pơm kiơ̆ ƀlep tơ drong hơ găt pơ long păng pơ tho đơ̆ng bơ ngai lăng pơ long. Đê pơ long sơ năm ‘nâu gô akŏm lơ̆m hla ar hŏk păng oei đei tơ̆ ‘ngoăih hai, kiơ̆ đơ̆ng noh chă rơih đei hŏk tro, lăp hăm ‘meh vă đơ̆ng lơ hnam trưng đại học iŏk yua điêm đơ̆ng ‘măng pơ long vă set tơ mơ̆t.

Thuem: Tơ blơ̆