VOV4.Bahnar - Ƀlep ƀơ̆t Khŭl tang măt gĭt kăl kơ Kuôk hô̆i teh đak CHNDND Lào năm bơ̆ jang tơ̆ Việt Nam păng vang akŏm dôm tơ drong jang “ Sơ năm tơ goăt tơ goăl jang tơ bôl” tơ băt 60 sơ năm Năr pơ jing tơ drong pơ vei jang tơ bôl păng 45 sơ năm Năr kĭ tơ chơ̆t jang tơ bôl păng jang hơ dai Việt Nam – Lào, lơ̆m kơ sơ̆ ‘năr 19/7, Khŭl tang măt Kuôk hô̆i Việt Nam yua đơ̆ng Bơ ngai jang lơ̆m Anih tơm Chĭnh trĭ, Phŏ kơ dră Kuôk hô̆i Trần Thanh Mẫn pơm kơ dră khŭl hlôi đei jơ pơ ma đam hăm Khŭl tang măt Kuôk hô̆i teh đak CHDCND Lào yua đơ̆ng ƀok Xủn-thon Xay-nha-chắc, Phŏ kơ dră Kuôk hô̆i teh đak CHDCND Lào pơm kơ dră khŭl. Hăm ‘meh vă ưh kơ đei pơ dơh hơ tŏk ‘lơ̆ng hloh dơ̆ng jang hơ dai đơ̆ng 2 teh đak tơ̆ hơ năp kơnh, 2 Kuôk hô̆i drơ̆ng nơ̆r tơ gŭm hơ drol tơ lĕch jang đei yua tơ drong drơ̆ng nơ̆r đơ̆ng 2 Anih tơm Chĭnh trĭ sơ năm 2022, drơ̆ng nơ̆r jang hơ dai đơ̆ng 2 Kuôk hô̆i; hơ tŏk loi dơ̆ng tơ roi băl tơ drong hlôh vao pơ jing trong jang tơ gŭm, khôi luơ̆t lơ̆m vei lăng kơ jăp hloh păng tơ iung ming mŭk drăm - tơ pôl lơ̆m tơ drong vei lăng sơ đơ̆ng hmă ‘nao”, pơ trŭt hơ tŏk ‘lơ̆ng đei yua jang hơ dai ŭnh hơ yuh, pơ tho pơ hrăm, jang pơ gang, tơ ƀơ̆p băl đơ̆ng kon pơ lei păng jang hơ dai đơ̆ng rim tơ ring, mă loi ‘noh jĭ jang hơ dai đơ̆ng dôm khŭl tang măt Kuôk hô̆i, Jơ nŭm pơ gơ̆r kon pơ lei rim tơ ring 2 teh đak.

Thuem: Tơ blơ̆