VOV4.Bahnar - ‘Năr (4/3), tơ̆ pơ lei tơm Phú Quốc, dêh char Kiên Giang, Anih tơm jang tơ bôl Việt Nam pơ gơ̆r hop akŏm pơ tôch 20 sơ năm tơ drong jang chĕng song teh hơ tâp jrăng sơ lam tơ̆ kông Việt Nam-Campuchia vă pơ tôch, hơ len lăng dôm jơ nei pơ ma đam hlôi iŏk đei. Hop akŏm yua đơ̆ng Kơ dră Anih tơm jang tơ bôl Bùi Thanh Sơn pơ gơ̆r, tang măt kơ dră chĕp kơ̆l rim Anih tơm, anih jang păng kơ dră chĕp kơ̆l 10 dêh char đei trong sơ lam tơ̆ kông hăm Campuchia vang akŏm. Bơ ngai jang lơ̆m Anih tơm Chĭnh trĭ, Phŏ Thủ tướng Phạm Bình Minh vang akŏm păng pơ gơ̆r hop akŏm.

Pơ ma tơ̆ hop akŏm Phŏ thủ tướng Phạm Bình Minh athei Anih tơm jang tơ bôl păng rim anih tơm, anih jang tơ ring ƀơm truh bơ̆ jang ‘lơ̆ng tơ drong jang vei lăng tơ ring sơ lam, vei lăng kơ jăp trong sơ lam, hơ nih hơ tâp jrăng sơ lam kiơ̆ dôm hla ar trŏ luơ̆t hlôi kĭ pơ kăp, vă tơ gop pơm hơ tŏk tơ iung mŭk drăm tơ pôl tơ klep hăm vei sơ đơ̆ng pơ jing tơ ring sơ lam đơ̆ng 2 teh đak jing tơ ring rơ ngei sơ đơ̆ng păng hơ tŏk tơ iung kơ jăp.

Thuem: Tơ blơ̆