VOV4.Bahnar - Kơ sơ̆ ‘năr 23/9, tơ̆ Hà Nội Anih tơm vei lăng găh tơ drong kơ tơ̆ng ang păng tơ roi tơ băt jang hơ dai hăm Anih Radiô nơ̆r pơ ma Việt Nam, Anih pơ dăh ti vi Việt Nam pơ gơ̆r hop akŏm “ Pơ trŭt hơ tŏk tơ iung tơ drong pơ re nơ̆r kơ sô̆, pơ dăh ti vi kơ sô̆ teh đak” yua đơ̆ng Anih tơm vei lăng găh tơ drong kơ tơ̆ng ang păng tơ roi tơ băt jang hơ dai hăm Anih radiô nơ̆r pơ ma Việt Nam, Anih pơ dăh ti vi Việt Nam. Lơ̆m teh đak dang ei đei 72 anih jang bơ̆ jang pơ re nơ̆r, pơ dăh ti vi ‘noh jĭ anih akŏm hơ dai đơ̆ng tơ drong tơm păng ki thuơ̆t. Lơ̆m khei ‘năr kơ măy kơ mŏk kơ sô̆, tơ plih kơ sô̆ nhen hrei ‘nâu tơ drong hơ tŏk tơ iung ‘lơ̆ng găh kơ măy kơ mŏk đei ƀơm truh rim tơ drong jang mŭk drăm - tơ pôl, lơ̆m noh đei tơ drong jang chih hla ar tơ roi, pơ re nơ̆r, pơ dăh ti vi.

Hop akŏm pơ trŭt hơ tŏk tơ iung tơ drong pơ re nơ̆r kơ sô̆, pơ dăh ti vi kơ sô̆ teh đak

Kơ măy kơ mŏk kơ sô̆ gô tơ plih dôm anih pơ re nơ̆r, ti vi păng tơ gŭm dôm Anih Radiô jang kiơ̆ hơ năp jang đơ̆ng kơ dih ‘lơ̆ng hloh tơ dăh tơ tom tơ plih pran kơ tang păng băt hơ dăh đei tơ drong hiôk. Tơ drong pơ re nơ̆r kơ sô̆ Teh đak tơ gŭm tơ pôl gơh mơ̆ng, mơ̆ng dơ̆ng dôm kênh pơ re nơ̆r tơ̆ Việt Nam rim jơ, rim hơ nih, jô̆ hloi hăm bơ ngai mơ̆ng, kon pơ lei đơ̆ng teh đak bơ̆n oei tơ̆ teh đak đe. Radiô nơ̆r pơ ma Việt Nam tŏk bŏk pơ jing Tơ drong jang kơ sô̆ pơ re nơ̆r teh đak păng tơ chĕng hơ drol blŭng jăl khei mă 3 sơ năm 2023 gô pơ tơm tơ mơ̆t bơ̆ jang.

Thuem: Tơ blơ̆