VOV4.Bahnar - Tŏ hang pơ dui đunh pơm ăn lơ hơ găt teh, lơ̆m akŏp kơ sô̆ hloh 609.000ha bri pơ tăm păng bri chăt kơ dih kơ dêh char Kon Tum tơ jră hăm hơ mơt kơ đei ƀôh ŭnh sa kơ tang. Kŭm hăm ‘noh khei ‘năr âu kŭm jing jơ năr kon pơ lei soh mir roh hơ met ăn pơ yan pơ tăm ‘nao kơ na hơ mơt kơ bri đei đe mơ̆t phă ‘noh tôch kơ lơ. Tơ̆ hơ năp tơ drong kơ pal khŭl linh kơ pal dêh char Kon Tum kŭm hăm anih jang tơ ‘ngla bri păng khŭl kơ dră rim tơ ring tŏk bŏk hơ tŏk loi dơ̆ng tơ drong jang vei lăng bri.

Mir roh kơ kon pơ lei tơ jê̆ hăm teh bri pơ tăm hơ mơt kơ đei ƀôh ŭnh sa tôch kơ tang

Băt hơ dăh dôm hơ găt bri hơ mơt kơ đei ƀôh ŭnh sa lơ, ƀônh kơ đei đe mơ̆t phă yua kơ tơ drong chong muih mir pơm roh, khŭl linh vei lăng bri ‘long dêh char Kon Tum kŭm hăm anih jang tơ ‘ngla bri păng khŭl kơ dră tơ ring hlôi hơ tŏk loi dơ̆ng khŭl jang gak prăt năr prăt măng. Hăm dôm tơ ring bri hơ dral hăm mir roh jang sa kơ kon pơ lei, khŭl jang kơ pal pơ gơ̆r ăn kon pơ lei kĭ pơ kăp ưh kơ mơ̆t phă lơ̆m hơ găt teh bri.

Thuem: Tơ blơ̆