Klo kăn mŏ Trương Thị Tuyết Vân, tơ̆ Kueng kơphô̆ Từ Nham, phường Sông Cầu, juăt rong hơdang jơ̆ng dreng hlŏh 15 sơnăm ‘nâu tơ̆ tơring đak dơsĭ Hòn Mắm. Mŏ Vân tơroi, đơ̆ng năr jang rong ka, tam mă lai yơ pŭ tơdrong hiong răm lơ nhen thoi đơ̆ng ‘mi kial kơsô̆ 13 (Kalmaegi) âu. Đĭ đăng hlŏh 60 hơdrao rong, hăm 1.500 tŏ hơdang vă tĕch păng 3.000 tŏ hơdang yŏng kial hơbŭt phă đĭ, lơ hơdrao rong truh dang ei chă tam mă ƀôh ‘mơ̆i. Kơsô̆ jên hre truh kơhrĕng triu đơ̆ng tŏk iŏk tơ̆ anih mong jên vă jang xa, oei gơnơm đơ̆ng pơyan rôp tĕch hơdang truh âu, dang ei hiong đĭ kiơ̆ kial hơbut bơih.

Mŏ Trương Thị Tuyết Vân: “Hiong răm lơ dêh, yoa hơdrao rong chô̆ hơdai hăm dôm unh hnam dơ̆ng, mă lei đak tơjroh hoch đĭ bơih, oei hnam nhôn ‘nŏh oei hre kơ anih mong jên truh 500 triu hlak jên dơ̆ng, đĭ vă truh năr kla bơih. Klo kăn măr nhi hơpơi kơ Teh đak tơgŭm vă gơ̆h rong hơdang dơ̆ng, tơdăh ưh đei rong hơdang lei ưh băt vă jang kiơ. Nhôn kŭm hơpơi ‘mĕh anih mong jên pơdui khei ‘năr kla hre, tơjur ƀiơ̆ jên kon păng tơdăh gơ̆h ‘nŏh asong tŏk iŏk jên dơ̆ng vă jang xa, chă jên kla hre.”

Yă Nguyễn Thị Sáu, tơ̆ plei Phú Mỹ, phường Sông Cầu, oei tam mă đĭ tơtơ̆ hli kơ ‘mi kial ‘mơ̆i. Hlŏh 120 hơdrao rong hăm hlŏh 2.000 tŏ hơdang tih vă rôp tĕch bơih kơ unh hnam, đei hơdrao đak hoch, đei hơdrao ‘nŏh hiăh pơm ăn hơdang lĕch đĭ tơ̆ ‘ngoăih, nhen pă đei xa kiơ. Yă Sáu nhen vă nhâm tơroi, mă trŏ ‘nŏh tŏk bŏk khei 11 âu vă tĕch, kla jên hre 1,5 ti đơ̆ng tŏk iŏk, mă lei ‘mi kial hơbŭt truh phă pơđĭ bơih:

“Hiong răm ưh đei băt hơdăh dôm yơ, mă lei unh hnam nhôn jô̆ pơhlom dang 1 puăt kơsô̆ hơdang tih. Hơdang âu vă gô đơ̆ng 5 - 7 năr dơ̆ng vă tĕch kla ăn anih mong jên ră mă lei kial hơbut tak đĭ bơih. Hơdang hiong bơngai nhen thoi lôch kiơ̆ ‘năi. Unh hnam nhôn hơpơi ‘mĕh anih mong jên pơdui dơ̆ng khei ‘năr kla hre, sut hŭt lê̆ jên kon vă nhôn gơ̆h jang xa dơ̆ng, dar dĕh kle jên hre.”

Tơter đak dơsĭ phường Sông Cầu tơring rong ka hơdang tơm kơ dêh char Phú Yên so, dang ei găh dêh char Đắk Lắk, hăm dôm tơmam rong tôch ‘lơ̆ng nhen hơdang tih jơ̆ng dreng, ka chim kok, ka mŭ. Hơdrô̆ tơring Hòn Mắm, Vũng Chao dang ei đei hlŏh 92.800 hơdrao rong ka hơdang, mă lơ ‘nŏh hơdang tih jơ̆ng dreng kơ dang 720 unh hnam.

Ƀok Huỳnh Đình Quang, Phŏ Kơdră vei lăng kon pơlei phường Sông Cầu, tơroi ‘mi kial kơsô̆ 13 (Kalmaegi) tơhlu klĕch tơring, kial hơbŭt tôch dêh, mă đơ̆ng ưh đei hiong răm găh bơngai mă lei hlôi pơm hiong răm tôch lơ găh mŭk drăm, mă loi ‘nŏh hăm dôm unh hnam rong ka hơdang tơter đak dơsĭ. Hrei ‘nâu Anih vei lăng kon pơlei phường oei chă hơlen năng, chih jô̆ tơmam hiong răm păng apinh anih jang kơpal jăh tơlĕch trong tơgŭm ăn kon pơlei.

Ƀok Huỳnh Đình Quang pơma: “Rong ka hơdang pơma atŭm păng hơdang jơ̆ng dreng pơma atŭm ‘nŏh hiong răm tôch lơ. Nhôn oei hơlen năng, chih jô̆ kiơ̆ jơ, kiơ̆ năr vă đei trong bơ̆ jang hăm anih mong jên, apinh đe sư tơlĕch trong pơdui khei ‘năr kla hre, tơgŭm dơ̆ng jên tŏk iŏk ăn kon pơlei jang xa. Găh noh dơ̆ng, nhôn chih hơnăn vă athei Anih vei lăng kon pơlei dêh char Đắk Lắk iŏk yoa jên tơgŭm đơ̆ng Jên mong tang găn sar bar vă tơgŭm 1 păh hiong răm ăn kon pơlei.”

Vă tơgŭm ăn dôm unh hnam rong ka hơdang, dôm anih mong jên tơ̆ phường Sông Cầu hlôi pơjing tơdrong ‘lơ̆ng ăn hlŏh 600 ‘nu bơngai tŏk iŏk vă jang xa, tĕch mơdro. Hơdrô̆ Agribank Sông Cầu - Phú Yên đei hlŏh 300 ‘nu bơngai tŏk iŏk hăm kơsô̆ jên truh 150 ti. Ƀok Hoàng Vũ Phi Phong, Kơdră vei lăng anih mong jên âu ăn tơbăt, anih mong jên oei jang hơdoi hăm dôm anih jang kơpal tơlĕch lơ trong tơgŭm vă đe gơ̆h iung jang xa dơ̆ng.

Ƀok Phong roi hơdăh 1,2 trong tơgŭm hăm bơngai tŏk iŏk tơƀâp tơdrong sar bar đơ̆ng ‘mi kial kơsô̆ 13 âu ki: “Hăm dôm unh hnam ưh pă đei tơmam vă jang xa, nhôn vă pơdui ming khei ‘năr kla jên hre kiơ̆ tơdrong hơgăt đơ̆ng Anih mong jên teh đak. Dôm bơngai tŏk iŏk mă đei tơdrong truh ‘nŏh athei pơdui khei ‘năr kla hre, nhôn vă hơlen năng tơdrong kĕ kla đơ̆ng đe sư vă đei trong asong tŏk iŏk dơ̆ng, mă ưh ‘nŏh hơmet ming jên hre, pơdui dơ̆ng khei ‘năr kla hre păng jên kon, vă đe đei khei ‘năr jang xa, tĕch mơdro dơ̆ng. Găh noh dơ̆ng, nhôn kŭm jang kiơ̆ trong tơjur jên kon vă kon pơlei da ƀiơ̆ hiong lơ jên vă jang xa, rong dơ̆ng ka hơdang.”

Tơdrong tơlĕch tơtom dôm tơdrong tơgŭm hăm jên kon tŏ sĕt nhen pơdui khei ‘năr kla hre, tơjur jên kon đơ̆ng asong tŏk iŏk vă tưk tơiung dơ̆ng đon adrin ăn kon pơlei tŏk klăih pơmat tat đơ̆ng ‘mi kial. Tơdrong vang yak hơdoi đơ̆ng khul kơdră tơring păng anih mong jên ưh lăp tơgŭm ăn kĕ iung dơ̆ng đơ̆ng rŏng kơ ‘mi kial phă pơrăm đĕch, mă oei pơjing jơhngâm pran vă đe sư gơ̆h tơmât jên jang xa, tơiung ming dơ̆ng tơdrong tĕch mơdro. Rim hơdrao rong ka hơdang dar deh đei pơm hơmet ming, hơnhăk ba đon hơmĕng kơ 1 pơyan jang xa ‘nao tơ̆ đak dơsĭ hiôk sơđơ̆ng, đei xa roi lơ ƀiơ̆./.