VOV4.Bahnar - Pơgê năr au, năr 18/1, tơ̆ Hà Nội, Pơgơ̆r blŭng a hop akŏm ‘măng mă 7 kơ Dơnŏ anih bơ̆ jang Kuô̆k hô̆i. Tơ̆ Hop akŏm au, Dơnŏ anĭh bơ̆ jang Kuô̆k hô̆i gô ăn tơgop nơ̆r lơ̆m lơ tơdrong kăl. Găh bơ̆ jang tơ iung pơjing khôi luơ̆t, tơ̆ hop akŏm au, Dơnŏ anĭh bơ̆ jang Kuô̆k hô̆i ăn tơgop nơ̆r găh: Tơdrong tơl hơdăh, tơgoăt iŏk, hơmet ming trong vă pơjing Khôi luơ̆t Pơlong dĭh băl jang pran kơtang, pôk hơpăh (hơmet ming); athei tơmơ̆t dơ̆ng trong vă pơjing Tơdrong tơchơ̆t kơ Kuô̆k hô̆i jang pơlong năng trong bơ̆ jang, pơjing tơdrong jang, pơtho tơdrong jang ăn bơngai yoch găh ‘ngoăih hnam pơnă chih tơmơ̆t lơ̆m Tơdrong jang tơ iung pơjing Khôi luơ̆t, tơdrong tơchơt sơnăm 2022; lăng hơlen, tơchơ̆t tơdrong hrŭk hơbĕn ao xek tơlang kơ Khŭl xek tơlang. Găh tơdrong jang mŭk drăm-tơpôl, Dơnŏ anĭh bơ̆ jang Kuô̆k hŏi ăn tơgop nơ̆r tơdrong tơmơ̆t dơ̆ng trong pơ prŏ tơmơ̆t jên jang đơ̆ng kon jên tĕh đak đe đơ̆ng kon jên tim mă klăh asong păng hơmet ming, tơchĕng hơlau trong pơ prŏ jang tơmơ̆t jên jang tĕh đak hăm kon jên jang Trung ương jăl jang 2021-2025 ăn rim tơdrong vă jang kơ rim Hơnĭh tơm, hơnĭh bơ̆ jang Trung ương păng tơring ( ‘măng mă 2). Atŭm hăm ‘nŏh, tơ̆ hop akŏm au, Dơnŏ anĭh bơ̆ jang Kuôk hô̆i gô lăng hơlen tơroi tơbăt bơ̆ jang kon pơlei jang khei 12/2021 kơ Kuô̆k hô̆i; Tơdrong vă jang hơmet ming khŭl jang păng biên chê̆ kơ Dơnŏ anĭh bơ̆ jang Kuô̆k hô̆i păng ăn tơgop nơ̆r găh pơtôch hot akŏm hăt hot ‘măng mă blŭng, Kuôk hô̆i jăl XV.

Tơblơ̆ nơ̆r: Amazưt