Iung pơma tơ̆ pơm lêh pơgơ̆r blŭng a, Thủ tướng Campuchia Samdech Techo Hun Sen lăng gĭt tơbăt 55 sơnăm năr pơjing ASEAN, yak hlŏh đunh đai tai sơnăm kơ tơgoăt tơgoăl păng jang hơdoi lơ̆m tơring, pơtrŭt kơtang tơgoăt dĭh băl kơ jăp rim tĕh đak lơ̆m khŭl ASEAN kơ yuơ tơdrong atŭm ‘nŏh rơngei hiôk hian, kơrŭn păng atŏk tơ iung.

Hop akŏm Kơdră kơpal ASEAN ‘măng mă 40, 41 păng rim ‘măng Hop akŏm Kơdră kơpal đei ƀơm trŭh ‘nŏh jơ ‘năr vă rim tĕh đak lăng dơ̆ng păng hơdrin iung jang ăn tơgoăt tơgoăl mĭnh nơ̆r ƀơ̆r đon, tôm tong păng ‘moi kiơ̆ tơdrong joăt. Lơ nơ̆r Tơchơ̆t gĭ kăl gô đei pơdrơ̆ng kiơ̆ nhen Nơ̆r tơchơ̆t tơbăt 55 sơnăm pơjing ASEAN, Nơ̆r tơchơ̆t ASEAN Iung jang: vang tơ jră mŭh măt păng Nơ̆r tơchơ̆t Tơdrong bơ̆ jang tơgoăt ASEAN đơ̆ng rŏng 2025, ‘nŏh jing pơchŏh trong jang vă pơtrŭt atŏk kơtang jang hơdoi mŭk drăm, atŏk tơ iung lei lăi, tơgoăt tơgoăl dĭh băl kơ jăp păng vei kơ jăp hơnăp jang hơnĭh tơm kơ ASEAN lơ̆m tơring.

Lăp đơ̆ng rŏng pơgơ̆r blung a, Kơdră chĕp pơgơ̆r rim tĕh đak ASEAN vang năm Hop akŏm Khul kơdră kơpal ASEAN ‘măng mă 40 păng ‘măng hop akom kơ toei ƀiơ̆ Khŭl kơdră Kơpal ASEAN ‘măng mă 41.