VOV4.Bahnar - Pơgê năr 28/3, tơ̆ Hnam Kuô̆k hô̆i, pơgơ̆r Hop akŏm Kơdră tang măt Kuô̆k hô̆i găh mĭnh ƀar tơdrong vă pơjing khôi luơ̆t pơtrŭh ăn kuô̆k hô̆i tơ̆ hop akŏm mă 3, Kuô̆i hô̆i jăl XV.

Pơgơ̆r blŭng a Hop akŏm Kơdră kơpla tang măt Kuô̆k hô̆i

Hop akŏm pơma dơnŭh, ăn tơgop nơ̆r găh 4 tơdrong vă jang: Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t pơm tơngla Trong tơchăr hơgei; Khôi luơ̆t Pơlong, pôk hơpăh (hơmet ming); Khôi luơ̆t Pơm phim (hơmet ming) păng Khôi luơ̆t tĕch mơdro ƀao hiêm (hơmet ming). Kơdră chĕp pơgơ̆r Kuô̆k hô̆i Vương Đình Huệ tơbăt, hăm hơmet ăn tôch hơlen, đơ̆ng hrôih, lăp đơ̆ng rŏng pơtôch hop akom mă 2, Dơnŏ anĭh chĕp pơgơ̆r Kuô̆k hô̆i hlôi pơrô̆ athei rim hơnĭh bơ̆ jang chĕp pơgơ̆r dăr lăng hơlen jang hơdoi hăm rim hơnĭh chĭh pơm tơlĕch păng rim hơnĭh bơ̆ jang ƀơm trŭh tĕnh koăng chĭh akŏm, tơblang hơdăh, tơgoăt iŏk nơ̆r tơgop đơ̆ng rim kơdră tang măt Kuô̆k hô̆i. Tơdrong hơmet ăn tôch hơlen rim tơdrong vă pơjing rim Khôi luơ̆t hơdrol pơtrŭh ăn kuô̆k hô̆i pơdrơ̆ng kiơ̆, vă trŏ lăp tôch ‘lơ̆ng rim tơdrong vă pơjing khôi luơ̆t, adoi pơkom đei jơ ‘năr hop akŏm kơ rim ‘măng hop akŏm Kuô̆k hô̆i.

Tơblơ̆ nơ̆r: Amazưt