‘Măng hop akŏm mă 4, Kuô̆k hô̆i jăl XV pơgơ̆r blŭng a pơgê au, năr 20/10 tơ̆ Hà Nội păng gô pơgơ̆r pơtôch lơ̆m năr 15/11/2022. Kiơ̆ tơdrong pơgơ̆r, pơgê au kơdră tang măt Kuô̆k hô̆i ‘măn gơvang pơkao păng mơ̆t hơpong Pơsat Kơdră chĕp pơgơ̆r Tĕh đak Hồ Chí Minh hơdrol vă hop akŏm pơprŏ hơdrol vă pơma dơnuh păng pơdrơ̆ng nơ̆r dôm tơdrong hop akŏm mă 4, Kuô̆k hô̆i jăl XV.

Rim Kơdră tang măt Kuô̆k hô̆i gô pơma dơnŭh păng tơchơ̆t lơ tơdrong kăl hop akŏm mă 4

‘Măng hop akŏm đei pơgơ̆r tơpă lơ̆m 9 jơ tơ̆ Hơnĭh hop akŏm Diên Hồng - Hnam Kuô̆k hô̆i (Hà Nội) păng đei rapor, pơdăh tivi kơtă vă bơngai tăh hla păng kon pơlei chă mơ̆ng, chă lăng. Tơ̆ Hop akŏm au, Kuô̆k hô̆i gô lăng hơlen, pơdrơ̆ng kiơ̆ 7 tơdrong vă pơjing Khôi luơ̆t: Khôi luơ̆t Đak dau yŭh sŏh (hơmet ming); Khôi Luơ̆t tang găn hil hơrĕh tĕh dong lơ̆m unh hnam (hơmet ming); Khôi luơ̆t dăr lăng (hơmet ming); Khôi luơ̆t jang kiơ̆ hơtŏ hơnơ̆ng tơ̆ tơring; Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Tần số vô tuyến điện; Khôi luơ̆t Khăm, ming hơmet jĭ (hơmet ming); Khôi luơ̆t Tang găn pơm pơ ‘lơ̆ng jên (hơmet ming); Tơdrong tơlĕch trong jang ‘măng hop akŏm Kuô̆k hô̆i (hơmet ming). 3 tơdrong vă pơjing Tơdrong tơchơ̆t jei đei lăng hơlen pơdrơ̆ng kiơ̆ ‘nŏh: Tơdrong tơchơ̆t găh jang pơlong năng ăn asong chă rơih kơ dĭh kơƀang kơsô̆ gre ôtô ‘moi kiơ̆ răt kơsô̆; Tơdong tơchơt găh jang pơlong năng mĭnh ƀar trong jang kăl atŏk tơ iung pơlei tơm Buôn Ma Thuột, dêh char Dak Lăk. ‘Ngoăih kơ ‘nŏh, Kuôk hôi gô bơ̆ jang dăr lăng; lăng hơlen, tơchơ̆t rim tơdrong mŭk drăm-tơpôl păng mĭnh ƀar tơdrong kăl kơ tĕh đak.