VOV4.Bahnar - Pơgê năr 15/2, pơgơ̆r blŭng a hop akŏm ‘măng mă 8, Dơnŏ anĭh bơ̆ jang Kuô̆k hô̆i. Đei pơgơ̆r đơ̆ng năr au trŭh đĭ năr 17/2, Dơnŏ anĭh bơ̆ jang Kuô̆k hô̆i ăn tơgop nơ̆r lơ̆m lơ tơdrong kăl. Mă hơdăh, Dơnŏ anih bơ̆ jang Kuô̆k hô̆i ăn tơgop nơ̆r găh tơdrong tơblang hơdăh, tơgoăt iŏk, hơmet ming tơdrong vă pơjing Khôi luơ̆t Kanh sat kơ đông păng tơdrong vă jang Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t pơm tơngla Tơdrong tơchăr hơgei; athei tơmơ̆t dơ̆ng tơdrong vă pơjing Khôi luơ̆t Khăm jĭ, hơmet jĭ (hơmet ming) lơm Tơdrong jang tơ iung pơjing Khôi luơ̆t, khôi luơ̆t tơm tĕh đak sơnăm 2022. Tơdrong pơjing Khôi luơ̆t Khăm jĭ, hơmet jĭ (hơmet ming) akŏm lơ̆m 3 tơdrong tơm ‘nŏh: lăng bơngai jĭ ‘nŏh kăl hlŏh, atŏk kơtang gơ̆h năm khăm, ming hơmet ‘lơ̆ng hơ iă. Pơjing lơ trong jang pơgang ming hơmet jĭ jăn; sơđơ̆ng tơdrong hơtŏ hơnơ̆ng ƀar păh hnam pơgang tĕh đak păng hnam pơgang kon pơlei pơm tơm. Adoi tơplĭh ‘nao trong bơ̆ jang ‘lơ̆ng hơ iă lăng trŭh jang kiơ̆ vei lăng năng tông bơngai jĭ tơnăp hlŏh dơ̆ng.

Tơblơ̆ nơ̆r: Amazưt