Hop akŏm ‘măng mă ou. Hơnih bơ̆ jang chĕp pơgơ̆r Trung ương gô lăng hơlen, tơchơ̆t dôm tơdrong kăl tơlĕch jang kiơ̆ Tơdrong tơchơ̆t Hop akŏm tih mă XIV kơ Đảng, găh tơdrong tơ iung pơjing Đảng, khul jang chinh trĭ păng atŏk tơ iung teh đak lơ̆m jăl ‘nao. Iung pơma tơ̆ pơgơ̆r blŭng a Hop akŏm, Tổng Bí thư, Kơdră chĕp pơgơ̆r Teh đak Tô Lâm pơma hơdăh, Hop akŏm tih mă XIV hlôi sơkơ̆t hơdăh trong jang gĭt kăl, tih tên; Hop akŏm Trung ương ‘măng mă 2 tơlĕch ăn trong chĕp pơgơ̆r păng iung jang lơ̆m jăl jang. Hop akŏm Trung ương ‘măng mă 3 kăl tơlĕch dôm trong vă jang ‘noh jing trong jang hơmet pơ ‘lơ̆ng tơhlăk tơhlĭn, hơmet pơ ‘lơ̆ng khul jang păng pơjing hơyak pran ăn atok tơ iung ‘nao. 13 tơdrong pơma dơnuh tơ̆ Hop akŏm găh lơ̆m lơ tơdrong lăng truh trong tơlĕch jang kăl hloh, pơjing đei jơhngơ̆m pran ăn chĕp pơgơ̆r, vei lăng, pơrô̆ iung jang, atŏk tơ iung păng vei lăng teh đak lơ̆m jăl ‘nao. Tổng Bí thư, Kơdră chĕp pơgơ̆r Teh đak athei, Trung ương akŏm pơma dơnuh jrŭ hloh dơ̆ng lơ̆m khul, tơƀôh hơdăh jơhngơ̆m đon tơ̆ hop akŏm, tơgop kơtă lơ̆m trong vă pơjing Tơdrong tơchơ̆t, Tơdrong jang, trong pơprŏ iung jang; iung pơma kăl mă tơpăt lơ̆m tơdrong yă kiơ̆ ‘noh hloi, nơ̆r tơgop mă hơđăl, hơdăh, tơpăt; tơgop ‘lơ̆ng ăn pơm pơkeh trong bơ̆ jang kơ Trung ương.