VOV4.Bahnar - Pơgê năr 3/10, tơ̆ Hơnĭh bơ̆ jang Trung ương Đảng, hop akŏm ‘măng mă 6 Khŭl kơdră chĕp pơgơ̆r Trung ương Đảng jăl 13 hlôi pơgơ̆r blŭng a kơ yuơ Tổng Bí thư Nguyễn Phú Trọng pơm tơm. 

Tổng Bí thư Nguyễn Phú Trọng iung pơma tơ̆ jơ pơgơ̆r blŭng a

Tổng Bí thư Nguyễn Phú Trọng hlôi pơma tơlĕch 5 tơdrong vă Trung ương chă pơma dơnŭh. Lơ̆m au, tơdrong mă blŭng ‘nŏh lăng hơlen tơdrong jang mŭk drăm-tơpôl, kon jên jang tĕh đak sơnăm 2022, trong pơprŏ jang atŏk tơ iung mŭk drăm-tơpôl, kon jên jang tĕh đak sơnăm 2023, Tổng Bí thư Nguyễn Phú Trọng athei, Trung ương chă tơchĕng hơlen mă brĕ Hla bơar tơbăt bơ̆ jang đơ̆ng Khŭl kơdră chĕp pơgơ̆r Đảng kơ Khŭl kơdră chĕp pơgơ̆r Tĕh đak păng tơdrong đei ƀô̆h yan au tơ̆ rim Hơnĭh tơm, hơnĭh bơ̆ jang, tơring hơnĭh bơ̆ jang, akom pơma dơnŭh, hơlen hơdăh dôm tơdrong iŏk đei jơnei lơ̆m sơnăm 2022, pơm hơdăh dôm dôm tơdrong jang keh đang; dôm tơdrong jang tim mă ‘lơ̆ng; tơbăt ăn dôm tơdrong đei ƀô̆h tơ̆ hơnăp au kơnh. Hơlen hơdăh chă lăng hơlen dôm trong jang, tơdrong tơlĕch jang vă tang găn hơlau, tơ jră tang găn kĕ jĭ hơbŭh, adoi tơgŭm ăn hơmet pơ ‘lơ̆ng, atŏk tơ iung mŭk drăm-tơpôl, mă kăl ‘nŏh iung jang hơdrol tang găn kơ jă tŏk jur, vei kơ jăp sơđơ̆ng jang mŭk drăm, sơđơ̆ng dơ̆ng kơ jăp tơpôl.

VOV/Amazưt tơblơ̆ nơ̆r