VOV4.Bahnar - Pơgê năr 4/5, Hop akŏm ‘măng mă 5 Khŭl kơdră chĕp pơgơ̆r Trung ương Đảng jăl 13 hlôi pơgơ̆r blŭng a tơ̆ Hơnĭh tơm Hà Nội. Tổng Bí thư Nguyễn Phú Trọng pơm tơm păng iung pơma lơ̆m pơgơ̆r blŭng a tơ̆ Hop akŏm.

Lăp đơ̆ng rŏng hơlen tôm tong dôm tơdrong kăl tơlĕch ăn găh 6 tơdrong kơ ‘măng hop akŏm, Tổng Bí thư Nguyễn Phú Trọng pơma hơdăh, dôm tơdrong pơtrŭh ăn Hop akŏm Trung ương ‘măng mă au ‘nŏh dôm tơdrong tĭh, tôch mơmat păng tôch gĭt kăl hăm tơdrong jang kiơ̆ jơnei Tơdrong tơchơ̆t Pơm lêh hop akŏm XIII kơ Đảng lơ̆m rim tơdrong kăl nhen: Atŏk kơtang atŏk tơ iung mŭk drăm-tơpôl kơ tĕh đak trŭh sơnăm 2030, lăng trŭh sơnăm 2045; atŏk kơtang tơ iung pơjing ming hơmet Đảng păng Tơdrong jang chĭnh trĭ roi năr roi rơgŏh, pran kơtang đơ̆ng tơm, đơ̆ng tơring, tơgăl hăm tơdrong ‘mĕh vă roi năr roi kơtang kơ kĕch mang lơ̆m chăl hle.

Tổng Bí thư Nguyễn Phú Trọng athei, Trung ương atŏk kơtang jơhngơ̆m đon bơ̆ jang, akŏm tơchĕng hơlen, pơma dơnŭh mă hơlen, ăn tơgop nơ̆r vă pơm pơkeh păng lăng hơlen, tơchơ̆t lơ̆m hơtuch hop akŏm. Mă kăl, kăl pơm hơdăh dôm tơdrong tơm pơm ăn, tơlĕch đei trong jang hơ iă păng tơlĕch ăn rim trong jang hơ iă hơmet pơ ‘lơ̆ng lơ̆m khei năr kơnh. Tơchĕng hơdrol hop akŏm đei pơgơ̆r trŭh năr 10/5.

Tơblơ̆ nơ̆r: Amazưt