VOV4.Bahnar - Pơgê năr 19/9 tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ pơm tơm păng iung pơma ‘măng pơgơ̆r blŭng a Hop akŏm găh Khôi luơ̆t khei 9/2022 kơ Dơnŏ anĭh chĕp pơgơ̆r Kuô̆k hô̆i vă tơgop nơ̆r găh tơdrong vă pơjing Khôi luơ̆t Pơma dơnŭh mơdro sa kiơ̆ điên tư (hơmet ming).

Đei pơgơ̆r lơ̆m 5 năr 1 poăt, tơ̆ hop akŏm au, Dơnŏ anĭh chĕp pơgơ̆r Kuô̆k hô̆i tơgop nơ̆r lơ̆m 7 tơdrong vă pơjing khôi luơ̆t păng 2 tơdrong vă pơjing tơdrong Tơchơ̆t, lơ̆m au đei tơdrong vă pơjing Khôi luơ̆t Groi tĕh (hơmet ming) vă pơtrŭh ăn Kuô̆k hô̆i tơ̆ ‘măng Hop akŏm mă 4, Kuô̆k hô̆i jăl XV. Iung pơma tơ̆ pơgơ̆r blŭng a, Kơdră chĕp pơgơ̆r Kuô̆k hô̆i Vương Đình Huệ tơbăt: Tơdrong vă pơjing Khôi luơ̆t Groi tĕh (hơmet ming) đei pơma dơnŭh, ăn tơgop nơ̆r tơ̆ 3 ‘măng hop akŏm. Kuô̆k hô̆i pơma dơnŭh tơ̆ ‘Măng hop akŏm mă 4 păng lăng hơlen Pơdrơ̆ng kiơ̆ lơ̆m ‘Măng hop akŏm mă 6 ƀơ̆t khei 11 sơnăm 2023. Kơdră chĕp pơgơ̆r Kuô̆k hô̆i pơma hơdăh, vă hơmet ăn dăr lăng hơlen tơdrong vă pơjing Khôi luơ̆t, trŭh dang ei Dơnŏ anĭh bơ̆ jang Mŭk drăm păng rim hơnĭh bơ̆ jang kơ Kuô̆k hô̆i hlôi pơgơ̆r lơ ‘măng hop akŏm, pơma dơnŭh.

Tơblơ̆ nơ̆r: Amazưt