Iung pơma pơgơ̆r blŭng a, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, khei năr ou ki, hăm tơdrong chĕp pơgơ̆r tôm tong đơ̆ng Đảng, tơdrong pơrô̆ jang kơtang đơ̆ng Trung ương, Hơnih tơm Chinh trĭ, Ban Bí thư atŭm hăm vang iung jang kơtang đơ̆ng pơđĭ khul chinh trĭ, jơhngơ̆m lăp đon, vang iung jang đơ̆ng kon pơlei, teh đak hlôi iŏk đei jơnei tih tên, tôm tong ‘lơ̆ng hơ iă. Kiơ̆ trong pơgơ̆r, lơ̆m dang 40 năr bơ̆ jang, Kuô̆k hôi gô lăng hơlen, pơma dơnuh păng tơchơ̆t lơ tơdrong gĭt kăl, lơ̆m ou đei 53 tơdrong vă pơjing khôi luơ̆t, tơdrong tơchơ̆t, đei 49 khôi luơ̆t. Kơdră chĕp pơgơ̆r Kuô̆k hô̆i sơkơ̆t hơdăh, ‘nou jĭ trong tơƀôh hơdăh ‘lơ̆ng hơ iă ăn trong jang “khôi luơ̆t kăl yak hơdrol mĭnh hơyăk”, pơchoh trong ăn tơplih ‘nao tơchăr, iŏk tơdrong hơrih, tơdrong đei iŏk yoa sa hơpăh kơ kon pơlei pơm ‘long pơtŏ ăn tơdrong bơ̆ jang ‘lơ̆ng.