‘Năr brei (16/3), tơ̆ Hà Nội, dôm Bơngai jang lơ̆m Anih tơm Chĭnh trĭ, Kơdră Anih tơm jang tơbôl Lê Hoài Trung, Kơdră Anih tơm vei lăng Khŭl lĭnh Phan Văn Giang păng Kơdră Anih tơm vei lăng an Lương Tam Quang hlôi kŭm hăm Kơdră Anih tơm jang tơbôl teh đak Trung Quốc Vương Nghị, Kơdră Anih tơm vei lăng Khŭl lĭnh Trung Quốc Đổng Quân păng Kơdră Anih tơm vei lăng kŏng an Trung Quốc Vương Tiểu Hồng vang pơgơ̆r Hop akŏm ‘măng mă mônh Pơma dơnuh gĭt kăl 3+3 tơ̆ Kơdră tơm jang tơbôl, Khŭl lĭnh păng Kŏng an Việt Nam - Trung Quốc.

Tơ̆ hop akŏm, 2 păh drơ̆ng nơ̆r hơlen lăng găh trong hơtŏk tơiung ‘lơ̆ng kiơ̆ trong vă jang “6 hloh” đơ̆ng pơvei Việt - Trung khei ‘năr âu ki. Vang tơgŭm băl găh dôm tơdrong đei ƀôh tơtĕnh, krê hơmơt đơ̆ng tơdrong apŭng plĕnh teh, tơring khei ‘năr âu ki, 2 păh drơ̆ng nơ̆r akhan tơdrong 2 teh đak hơtŏk loi dơ̆ng pôm ƀơ̆r đon, jang hơdai, hơmet ming đon lui chĭnh trĭ, vei lăng tôm đơ̆ng hơtŏk tơiung păng sơđơ̆ng, hơdrin jăl trong xã hội chủ nghĩa, vang tơgŭm hăm tơpôl apŭng plĕnh teh tơjră hăm dôm long nol atŭm găh sơđơ̆ng păng hơtŏk tơiung kiơ̆ lơ̆m trŏ lăp hăm khôi luơ̆t apŭng plĕnh teh păng Tơdrong tơchơ̆t Liên hợp quốc roi ‘năr roi jing kăl hloh. 3 Kơdră tơm păih Trung Quốc pơma hơdăh Trung Quốc lăng kăl păng ling lang kŭm hăm Việt Nam vei kơjăp pơm kiơ̆ hlôh vao atŭm kơdră kơpal, hŏk pơhrăm dih băl, vang tơroi băl tơdrong hlôh vao găh pơjing Đảng, vei lăng teh đak, vei lăng kơjăp tơdrong đei yua sơđơ̆ng păng hơtŏk tơiung kơ 2 teh đak.