Pơma tơ̆ Hop akŏm, Thủ tướng Phạm Minh Chính tơroi rơđăh: Hop akŏm Mŭk drăm pơyan hla ruih sơnăm 2025 ưh khan lăp jĭng 1 tơdrong jang apŭng plĕnh teh gĭt kăl, mă oei jing tơdrong pơih đei 1 jăl trong ‘nao ƀĕnh tơdrong hơpơi ‘meh lơ̆m tơdrong jang hơdai hơtŏk tơiung păng mơ̆t jang hơdai lơ̆m apŭng plĕnh teh kơ Việt Nam; yua kơ tơdrong rơngei, sơđơ̆ng, jang hơdai păng hơtŏk tơiung lơ̆m tơring păng lơ̆m apŭng plĕnh teh.

Thủ tướng pơma hơdăh, Hop akŏm Mŭk drăm pơyan hla ruih sơnăm 2025 jing tơdrong jang tih tơƀôh rơđăh đon gơh hơgei akŏm, trĕng lăng vang tơgŭm păng bơ̆jang păr ang đơ̆ng Việt Nam kŭm hăm tơpôl apŭng plĕnh teh. Thủ tướng lui ngeh dôm nơ̆r tơgop, pơcheh păng pơkăp đei tơroi tơ̆ Hop akŏm Mŭk drăm pơyan hla ruih sơnăm 2025 gô hơnơ̆ng păr ang păng đei bơ̆jang kiơ̆ ‘lơ̆ng hăm dôm tơdrong jang hơdăh - pơih ăn dôm tơdrong hơ mĕng jang hơdai ‘nao păng dôm tơdrong jang hơdăh vă vang pơcheh pơm mĭnh khei ‘năr tơ̆ hơnăp kơnh hơtŏk tơiung rơgoh, kơsô̆ păng ‘mêm mơnat ăn đĭ đăng kon bơngai.