Kiơ̆ tơchĕng hơdrol, ‘măng hop akŏm gô pơgơ̆r lơ̆m 06 năr. Tơ̆ ‘măng hop akŏm âu, Anih chĕp kơ̆l pơgơ̆r Quốc hội gô ‘măn găh lơ jơ năr akŏm ăn tơdrong jang pơjing khôi luơ̆t, hăm tơdrong set hơlen, ăn tơgop nơ̆r hăm 21 Luơ̆t.

Hơdai hăm ‘noh, Anih chĕp kơ̆l pơgơ̆r Quốc hội gô set hơlen, pơdrơ̆ng kiơ̆ Tơdrong tơchơ̆t pơtho tơdrong băt hơdăh tơchĕng hơlen hơmet ming, khŭl jang păng klăih song kơsô̆ bơngai đei roi tơƀôh lĕch pơjei bơngai tang măt Jơnŭm pơgơ̆r kon pơlei rim tơring jăl jang 2026-2031; Tơdrong tơchơ̆t găh kơsô̆ thuê̆ vei lăng cham char hăm đak xăng, đak dâu, nhơt lơ̆m 2026. Anih chĕp kơ̆l pơgơ̆r Quốc hội kŭm gô ăn tơgop nơ̆r ‘măng mă 3 găh tơdrong hơmet ăn ‘Măng hop akŏm mă 10, Quốc hội jăl XV.