‘Măng pơlong đei 18 hơnĭh hăm vă jê̆ 900 ‘nu hok tro vang năm. Tơ̆ ‘măng pơlong au rim đe ŏh hlôi tôn lơ ƀai chĭng chêng, hơsoang joăt joe kơ bơngai Xơđăng, Băhnar, Jeh Triêng, Jrai…Adoi pơgơ̆r kơ̆m kang kơnang giĕng lơ̆m kon pơlei nhen, Et jur sa, kơ̆m ming hơdrơ̆m đak.

Pơgơ̆r pơlong tôn chĭng chêng-hơsoang tơgop gĭt kăl ăn vei răk tơƀăk mong tơdrong joăt joe tôn chĭng chêng kơ kon pơlei rim hơdrung kon kông. Adoi hơtŏk jơhngơ̆m đon hưch hanh hơmanh bơnê kơ hơdrĕch hơdrung, jơhngơ̆m đon ‘mêm kơ eng pơlei pơla, tĕh đak ăn đe ŏh hŏk tro păng pơtrŭt kơtang pơgơ̆r jŏh ayŏ kơdŏ soang, pơjing jơ ‘năr chơt hơ iă ‘nă hal lơ̆m rim hnam trương tơring kon kông lơ̆m dêh char Kon Tum.