Hop akŏm ‘măng mă âu akŏm pơma găh 2 tơdrong tôch gĭt kăl, ‘nŏh jĭ grŭp dôm tơdrong ƀơm truh Hop akŏm mă XIV kơ Đảng păng grŭp tơdrong găh tơiung pơjing Đảng păng anih jang chinh trĭ. Pơma pơih blŭng hop akŏm, Tổng Bí thư Tô Lâm pơma hơdăh, tơ̆ hop akŏm âu, Khul kơdră chĕp kơ̆l Trung ương vă tơgop nơ̆r găh kơ sô̆ Kơdră jang lơ̆m Anih tơm Chinh trĭ, Kơdră jang lơ̆m Ban Bí thư jăl XIV păng rơih hơmet bơngai vă jang lơ̆m Anih tơm Chinh trĭ, Ban Bí thư jăl XIV. ‘Nâu jĭ tơdrong jang tôch gĭt kăl, jĭ tơdrong kăl hlŏh kơ rim tơdrong kăl yoa rim tơdrong tơchơ̆t tih đei đơ̆ng bơngai jang tơm âu ngăl.

Chă rơih bơngai jang lơ̆m Khul kơdră chĕp kơ̆l tih hlŏh kơ Đảng vă chĕp kơ̆l pơgơ̆r tơlĕch jang dôm tơdrong vă pơhnŏng tôch ai, khŏm tưk tơiung teh đak lơ̆m chăl ‘nao kơna athei rơih mă hơlen hlŏh dơ̆ng, kơchăng păng trŏ ƀlep hlŏh dơ̆ng.Tổng Bí thư akhan, ‘ngoăih kơ dôm tơdrong hơgăt rơih bơngai đei chih nhen thoi dôm Kơdră jang lơ̆m Trung ương mă bơ̆n hlôi tơlĕch lơ̆m hop akŏm Trung ương 12 păng 13 ‘nao âu, tơdrong chă rơih bơngai jang lơ̆m Anih tơm Chinh trĭ, Ban Bí thư jăl XIV athei đei dơ̆ng dôm tơdrong gĭt kăl lăp hăm jăl jang kăch mang ‘nao đơ̆ng Đảng bơ̆n, teh đak bơ̆n.