Kiơ̆ tơroi đơ̆ng dêh char, jơnŭm pơgơ̆r tơdrong jang choh jang xa păng cham char tơ̆ tơring hlôi pơm jang sơđơ̆ng, mă lei đei ƀôh lơ “anih tơhlăk”. Lơ̆m noh tơdrong pơkăp, pơjao teh, ăn thuê teh, hrŭ 'mong iŏk teh ming man, asong anih oei 'nao đei ƀôh tơsŭl tơsăl; minh ƀar tơchơ̆t jang hanh chĭnh tơhlăk tăk ah mă jơnŭm pơgơ̆r kơ dôm jăl jang tam mă đei pơkăp hơdah; Khul jang vei lăng bri, khul jang hơmet jĭ ăn kon tơrong ƀơm lơ tơnap tap gah bơngai jang păng jên hơpah jang; tơdrong pơkăp iŏk yua teh jăl sơnăm 2026–2030 ƀơm adar kơlih pơkăp khôi luơ̆t tam mă đei tơroh dih băl; dôm hla bar chih măt tơring pơtăm, pơkăp 'nŭng tơmam drăm, pơkăp vei lăng tơmam pơtăm tam mă đei drơ̆ng minh, pơm ăn tơdrong jang tĕch tơmam ăn teh đak đe kơ anih jang mŭk drăm ƀơm lơ tơnap tap.

Sơkơ̆t ah 'năr pơm jang, Thư̆ trương Phùng Đức Tiến bơnê kơ tơdrong kơchăng tơpăt đơ̆ng Khánh Hòa lơ̆m tơdrong tơroi hơdah tơdrong đei ƀôh; pơgơ̆r dêh char Khánh Hòa pơtoi chih akŏm pơdrơ̆ng dih băl dôm pơkăp jang gah teh, vei sơđơ̆ng dôm jăl jang băt hơdah gah kơjă teh păng pơkăp yua teh lơ̆m jăl jang 'nao. Rim anih juăt jang kơ Anih tơm athei jang atŭm hăm tơring keh đang tơdrong pơtho tơƀôh vă vei sơđơ̆ng tơdrong jang vei lăng đơ̆ng teh đak lơ̆m tơdrong choh jang xa păng cham char gơh sơđơ̆ng tơnăp, đei jơnei, pơm jang trŏ nhen tơdrong pơkăp jơnŭm pơgơ̆r tơring 2 tăl.