Hăm hơnăn “Đà Lạt – Pơlei tơm (plt) puăn pơyan pơkao”, Festival pơkao Đà Lạt ‘măng mă 9 sơnăm 2022 ‘nŏh jĭ tơdrong pơgơ̆r pơ ‘yoi kiơ̆, tơƀôh hơdăh tơdrong kăl, pôk pơ ư bơngai pơtăm pơkao păng roi tơƀôh dôm kơjă kăp gĭt đơ̆ng pơkao, dôm tơmam choh jang xa đei ư hơ nhang păng tơmam ‘lơ̆ng đơ̆ng Đà Lạt – Lâm Đồng nhen: ‘nhot, hla che, cheh phe, che luơ̆.

Pơma lơ̆m jơ pơm lêh pơih blŭng, Phŏ Kơdră vei lăng tĕh đak Võ Thị Ánh Xuân akhan, Festival pơkao Đà Lạt ‘măng mă 9 jĭ tơdrong lêh tôch hơiă, đei lơ tơdrong jang tôch gĭt kăl, vă pôk pơ ư tơdrong ‘lơ̆ng đơ̆ng Đà Lạt hai, vă tưk tơiung tơdrong jang xa, tĕch mơdro păng tĕch pơkao, tơmam đơ̆ng choh jang xa đei tơ̆ tĕh đak đe hai, hăm dôm tơmam hlôi iŏk đei hơnăn “Đà Lạt – tơmam đơ̆ng groi tĕh ‘lơ̆ng”.

Phŏ Kơdră tĕh đak pơma hơdăh, ‘nâu kŭm jing tơdrong ‘lơ̆ng vă roi tơƀôh um rup tơring tĕh Đà Lạt ‘lơ̆ng rŏ, kon bơngai Đà Lạt “iâm dim, ‘mêm tơmoi”, tơgop ăn tơdrong atŏk tơ iung chă tơmang lăng, jang tơiung ming păng jang tŏk mŭk drăm, tơpôl đơ̆ng rŏng kơ jĭ Covid-19.