Hnam hŏk Đăi hŏk Đông Á tơ̆ Dak Lak pơm lơ̆m hơgăt tĕh xă 10 ha, đei 115 lăm hŏk chư, 27 lăm pơtâp jang, anih đŏk hla ar, anih tơplŏng kơdâu păng lơ lăm gĭt kăl nai hai. Tơdrong pơtho pơhrăm sơ năm mă blŭng đơ̆ng 2022-2030 tơ̆ hnam hŏk đei 6 tơdrong jang đei pơtho pơhrăm ‘nŏh: Vei lăng tĕch mơdro, Vei lăng Hnam hotel, Vei lăng tơmoi chă tơmang lăng, Kơmăy pơm tơmam xa, jang Điều dưỡng, Kơmăy kơmŏk tơroi tơbăt. 

Pơma lơ̆m jơ pơm lêh, ƀok Nguyễn Văn Phúc, Phŏ Kơdră tơm vei lăng pơtho pơhrăm akhan, ‘nâu jĭ 1 hơyak tŏk ‘nao đơ̆ng hnam trưng Đăi hŏk Đông Á lơ̆m tơdrong adrin atŏk tơiung tơdrong pơtho hŏk pơhrăm păng tơƀôh trong pơtho hŏk, pơjing dơ̆ng khul bơngai jang rơgei, pơyoa ‘lơ̆ng ăn tơdrong pơjing, atŏk tơiung mŭk drăm, tơpôl tơ̆ tơring Tŏk bŏk păng Tây Nguyên pơma adrô̆, lơ̆m tĕh đak pơma atŭm.