‘Nâu jĭ ‘măng năm ngôi tih mă blŭng truh tơ̆ Nga đơ̆ng Kơdră chĕp kơ̆l Đảng, Teh đak bơ̆n iŏk đơ̆ng sơnăm 1991, đei đơ̆ng rŏng kơ Hop akŏm mă XIV kơ Đảng păng tơdrong pôk rơih Quốc hội jăl XVI. Sơnăm 2025, jên tĕch mơdro đơ̆ng Việt Nam - Nga iŏk đei vă jê̆ 4,8 ti USD; 5 khei blŭng sơnăm ‘nâu iŏk đei 2,16 ti USD, tŏk 6,4% pơting hăm khei âu sơnăm sơ̆. Jô̆ truh khei 7, Nga đei 223 tơdrong tơmât jên jang tơ̆ Việt Nam, hăm kơsô̆ jên vă jê̆ 1 ti USD; Việt Nam đei 19 tơdrong jang tơ̆ Nga, akŏm kơsô̆ jên kĭ pơkăp tơlĕch jang truh 1,64 ti USD.

Ƀar teh đak oei hơtŏk tơdrong jang hơdoi găh khul linh, vei sơđơ̆ng teh đak, unh hơyuh, khoa hŏk – kơmăy kơmŏk, pơtho pơhrăm, jŏh ayŏ kơ dŏ xoang păng chă tơmang lăng; lơ̆m noh đei Tơdrong jang man Anih tơchĕng hơlen khoa hŏk păng kơmăy kơmŏk hat nhân. ‘Măng năm ngôi vang tơgop pơm hơdăh trong jang tơbôl yoa kơdih pơm tơm, lơ pang, lơ trong jang đơ̆ng Việt Nam, yoa tơdrong đei yoa kơ kon pơlei 2 teh đak, yoa tơdrong rơngei păng jang tŏk. ‘Măng năm ngôi đei hơmĕng pơjing đei chăl ‘nao, tưk tơiung tơdrong pơvei gĭt kăl, jang hơdoi tôm tơdrong đơ̆ng Việt Nam - Nga tŏk pran hlŏh dơ̆ng, roi đei yoa păng kơjăp ‘lơ̆ng hlŏh dơ̆ng; atŭm hăm ‘nŏh pơm pơ ‘lơ̆ng đon lui kăp gĭt păng tơdrong pơvei jang tơbôl ‘lơ̆ng hơiă đơ̆ng sơ̆ kơ 2 teh đak.