‘Măng jang sơlam Lệ Thanh pơm tơ̆ trong Gre 19, tơƀưh hăm Tơnok Quy Nhơn (235 km) păng dôm dêh char Tây Nguyên, tôch hiôk ăn tơdrong chơ chuĕn tơmam. Tơring jang mŭk drăm sơlam hăm dêh char Ratanakiri (Campuchia). ‘Măng jang đei lơ̆m tơring Kơlang 3 pang jang tŏk Việt Nam - Lào - Campuchia, đei lơ tơdrong ‘lơ̆ng vă gơ̆h tŏk jing anih tĕch mơdro tih klĕch tơring sơlam.

Jô̆ truh đĭ khei 8/2025, akŏm đĭ đăng jên tech mơdro tơmam kiơ̆ ‘măng jang sơlam Lệ Thanh, đei 155 triu USD. Lơ̆m noh, tĕch tơ̆ tĕh đak đe đei 63 triu USD hăm dôm tơmam tơm nhen pơsei, phŏng, rơmo oei arih; pơm hla ar tĕch tơmam tơ̆ băl, mă lơ ‘nŏh jĭ prit, tŏk 59% pơting hăm khei âu sơnăm sơ̆. Kơsô̆ gre păng tơmoi yak vih vât kŭm tŏk lơ. Mă lei, kiơ̆ dôm anih tĕch mơdro, tơdrong tĕch mơdro xa kiơ̆ ‘măng jang sơlam âu oei tơvŏk ƀơm 3 tơdrong pơmat tat ‘nŏh: tơdrong pơm hla ar mât lĕch, pơdreo thuê̆ hơtŏk kơjă tơmam oei pơmat tat; jên pơhuach vă mât lĕch oei lơ, pơm pơmat tat tôch dêh mă loi hăm tơmam đơ̆ng choh jang xa. Găh anih jang, trong nơnăm, 5 anih mong tơmam dang ei tơtă pơm tơ̆ ‘ngoăih kơ ‘măng jang ngăl, pơm pơmat tat ăn anih jang logistics; mă loi pơyan hăm pơyan tơm. Jơ năr bơ̆ jang ưh kơ đei hrơ̆ch ‘lơ̆ng đơ̆ng ‘măng jang sơlam Lệ Thanh (20h00) păng Oyadav (17h30) kŭm pơm pơmat tat ăn tơdrong chơ chuĕn tơmam mât lĕch ‘năi. 

Ƀok Bùi Trần Nhân Trí – Phŏ Kơdră THILOGI (Công ty chơ ba tơmam apŭng plenh teh Trường Hải) đei nơ̆r pơma: “Đei 1 hla ar iĕ đĕch, mă lei găn trong jang đơ̆ng anih tĕch mơdro jing hiơ̆ hyĭn. ‘Nŏh jĭ hla ar hơlen năng pơrang jĭ. Kiơ̆ tơdrong hơgăt, hla ar hơlen năng pơrang jĭ ‘nŏh Campuchia pơm ƀơk tơ̆ Phnom Penh. Lơ̆m teh đak ‘nŏh đei hla ar tơm. Mă lei đơ̆ng Phnom Penh vih tơ̆ ‘măng jang sơlam Lệ Thanh athei hiong 2 -3 năr ‘mơ̆i, kơplăh ‘nŏh năr yơ kŭm pơm hla ar ngăl. Apinh anih hơlen năng pơrang jĭ tơ̆ ‘long pơtăm drơ̆ng nơ̆r ăn hla ar scan hăm điên tư adrol, pơjing tơdrong ‘lơ̆ng hlŏh ăn anih tĕch mơdro. Yoa bơ̆n tĕch prit, mưh gô 2 - 3 năr ‘nŏh tôch kơ hiơ̆.”

Ƀok Phạm Anh Tuấn – Phó Bí thư Đảng dêh char, Kơdră vei lăng kon pơlei dêh char Gia Lai athei: dôm anih jang kơpal, jăh hơlen năng, sek tơlang hloi dôm nơ̆r athei tôch tơgăl đơ̆ng anih tĕch mơdro; atŭm hăm ‘nŏh hơtŏk tơdrong hơmet ming trong pơm hla ar, tơplih ‘nao jơhngâm đon bơ̆ jang kiơ̆ trong vang yak hơdoi, vang tơgŭm ăn. Găh đunh đai, dêh char vă chĕng hơmet dơ̆ng ‘Măng jang sơlam Lệ Thanh păng hơmet ming tơdrong jang atŏk tơiung Tơring jang mŭk drăm tơ̆ ‘măng jang sơlam; atŭm hăm ‘nŏh bơ̆ jang hăm dêh char Ratanakiri (Campuchia) lơ̆m khei 10/2025 vă hơmet pơ ‘lơ̆ng dôm tơdrong oei tơhlăk.

Kơdră vei lăng kon pơlei dêh char Gia Lai oei krao hơvơn anih tĕch mơdro kơchăng tơchĕng hơlen chă anih tĕch mơdro xa, pơih xă trong jang ‘nao, mă loi ‘nŏh tơdrong pơm hơmet mă ‘lơ̆ng tơmam jang đei đơ̆ng dôm tơring rei pơtăm lơ̆m teh đak păng tơ̆ Campuchia vă tĕch tơ̆ teh đak đe. Ƀok Phạm Anh Tuấn pơkăp, khul kơdră pơgơ̆r dêh char vă hơnơ̆ng yak hơdoi, pơjing tơdrong ‘lơ̆ng, hiôk hian, năm truh đon pơhnŏng hơnhăk jên tĕch mơdro kiơ̆ ‘măng jang sơlam Lệ Thanh đei đơ̆ng 2 - 3 ti USD lơ̆m sơnăm 2030:

“Găh anih tĕch mơdro, inh athei jăh bơ̆ jang hloi, jăh kĭ măt văi. Bu ‘mĕh jang logistics, bu ‘mĕh pơm hơmet pơ ‘lơ̆ng tơmam đơ̆ng choh jang đei, tơlĕch nơ̆r kăl dôm ha, jang yă kiơ, tơring vă pơtăm tơmam tơ̆ yơ? Trong jang ‘nŏh pôi akŏm đĭ tơring pơtăm tơmam âu păng dôm dêh char kơ Campuchia, akŏm minh ƀôt, pơm hơmet mă ‘lơ̆ng, đơ̆ng rŏng kơ ‘nŏh tĕch tơ̆ teh đak đe kiơ̆ trong gre kơsô̆ 1, jur tơ̆ tơnŏk đak jrŭ Phù Mỹ, tơnŏk Quy Nhơn. Tơlĕch pơđĭ dôm tơdrong kiơ kăl, găh thuê̆, găh jên jang. Anih tĕch mơdro athei yak hơdoi hăm dêh char lơ̆m tơdrong chĕng hơmet, pơjing dơ̆ng Tơring jang mŭk drăm tơ̆ ‘măng jang sơlam Lệ Thanh tơ̆ hơnăp kơnh.”

Hop akŏm Đảng ƀô̆ dêh char Gia Lai ‘măng mă I, jăl jang đơ̆ng 2025-2030 vă pơgơ̆r đơ̆ng ‘năr 2/10 - 4/10, Đảng ƀô̆ păng kon pơlei Gia Lai hăm đon pơhnŏng hơnhăk Gia Lai tŏk jing dêh char đei ƀôh. Jăl jang đơ̆ng 2025-2030 đei năng jĭ jăl jang tŏk pran hăm đon pơhnŏng jang tŏk mŭk drăm hlŏh 10% 1 sơnăm.

Ƀok Hồ Quốc Dũng, Kơdră jang lơ̆m Trung ương Đảng, Bí thư Đảng dêh char Gia Lai akhan, vă jang đei dôm tơdrong hơgăt lơ̆m jăl jang đơ̆ng 2025-2030 hơnhăk Gia Lai tŏk jing dêh char đei ƀôh, dêh char chih hơdăh "5 tơdrong vă jang tŏk, 4 tơdrong pran", lơ̆m noh, đei jang tŏk găh logistics tơnŏk duk đak dơsĭ tơguăt hăm pơm trong gre păng trong gre kơdâu hrĕnh Quy Nhơn - Pleiku, ‘Măng jang sơlam Lệ Thanh, Tơnŏk apŭng plenh teh Quy Nhơn:

“Mă mônh ‘nŏh jĭ  atŏk tơiung kơmăy kơmŏk, mă loi jĭ kơmăy kơmŏk pơm hơmet tơmam, jang xa kiơ̆ tơdrong pran ‘lơ̆ng đơ̆ng dêh char. Mă 2 ‘nŏh atŏk tơiung tơdrong pơvih pơvăn, chă tơmang lăng, iŏk yoa rim tơdrong ‘lơ̆ng đơ̆ng tơring groi kông, đơ̆ng tơring đak dơsĭ, tơdrong ‘lơ̆ng găh chăl arih so sơ̆, joh ayŏ kơ dŏ xoang, anih ‘lơ̆ng rŏ păng bri kông vă hơnhăk Gia Lai jing 1 anih truh tôch hơiă tơ̆ tơring păng lơ̆m teh đak. Hơnhăk Gia Lai jing 1 anih truh ‘lơ̆ng hơiă lơ̆m lakak chă tơmang lăng kơ teh đak păng tơ̆ tơring. Mă 3 ‘nŏh atŏk tơiung găh logistics tơnŏk duk tơ̆ đak dơsĭ hăm trong gre păng trong gre kơdâu hrĕnh Quy Nhơn - Pleiku, ‘Măng jang sơlam Lệ Thanh, Tơnŏk apŭng plenh teh Quy Nhơn, pơjing trong Logistics găh Hơlĕch-Pơmât vă pơjing 1 lơ̆m dôm tơdrong jang tŏk tơm kơ dêh char”.