Dang ei jơ̆p teh đak đei hloh 86.000 Khul vei sơđơ̆ng tơpôl hăm hloh 276.000 'nu bơngai vang jang. Đơ̆ng rŏng 1 sơnăm iŏk jang Luơ̆t Khul linh vang vei lăng sơđơ̆ng tơpôl tơ̆ tơring, đei jơnei hơdah noh tơpôl tơ̆ tơring hơnơ̆ng đei vei sơđơ̆ng, tơdrong pơm yoch đei tơjur ƀôh hơdah; lơ tơring tơdrong sar bar trong gre nơnăm tơjur hơdah, tơdrong pơm glăi lơ̆m tơpôl đei tang găn; tơdrong jang tôm kon pơlei vei sơđơ̆ng tơpôl roi năr roi đei jang tơnăp, tơgop pơjing, hơmet anih jang vei sơđơ̆ng tơpôl tơguăt hăm tơdrong jang tôm kon pơlei vei lăng sơđơ̆ng tơpôl... Pơjao dôm tơchơ̆t pôk hơpah ăn dôm bơngai jang hơgei ah 'măng Hop akŏm, Thủ tướng Phạm Minh Chính thơ thou hơ-iă păng sơkơ̆t hơdah, dôm tơdrong tơgop kăp gĭt kơ khul jang vang vei lăng sơđơ̆ng tơpôl tơ̆ tơring – khul jang kơtă tơguăt hăm kon pơlei.

Mă thoi noh, Thủ tướng tơƀôh hơdah, tơdrong tơgŭm hơnơ̆ng rim khei ăn khul jang ou tơ̆ minh ƀar tơring oei kơđeh; tơmam drăm, kơmăi kơmŏk, tơmam tơgŭm oei lơ tơnap tap... Ƀok pơtruh nơ̆r athei hơlen chih tơlĕch asong jên mong Trung ương vă tơgŭm ăn dôm tơring tơnap tap, tơring groi kông, tơring hơtaih yaih lơ̆m tơdrong kla jên jang, hơmet tơmam drăm ăn khul jang vei sơđơ̆ng tơpôl tơ̆ tơring. Anih tơm Kŏng an athei hơnơ̆ng pơtho pơhrăm vă hơtŏk hlôh vao gah luơ̆t, tơdrong jang; pơtoi hơlen, hơtŏk tenh tơdrong hơmet tơmam drăm jang ăn khul jang vă tom pơtrŏ hăm sơnong pơjao jang.